හැබෑටම මේ තක්කලි වලින් ගහගන්න පුළුවන් කාලයක්ද?

තරහට කුණු තක්කාලිවලින් ගැහුවට විනෝදෙට කාට හරි තක්කාලි ගෙඩියකින් ගහන්න පුළුවන් කමක් නැත්තේ තක්කාලි මිල අධික නිසා. විශේෂයෙන්ම අවුරුද්ද , නත්තල වගේ උත්සව ළං වෙනකොට කෙසෙල් ගෙඩි විතරක් නෙමේ තක්කාලිත් හඳෙන් ගෙනාපු ගාණටනෙ විකිණෙන්නේ. ඒත් ස්පාඤයේ වැලෙන්සියා ප්‍රන්තයේ බියුනෝල් නගර වැසියෝ අවුරුද්දකට වතාවක් ජොලියට තක්කාලි ගහ ගන්නවා. මේ අය 1945 ඉඳන්ම මේ තක්කාලි ගැසීම කරගෙන ඇවිත් තියෙනවා.

දැන් ඒ උත්සවය ස්පාඤ භාෂාවෙන් හඳුන්වන්නෙ ‘ලා ටොමටිනා’ කියලයි. ‘gigantes y cabezudos’ එහෙමත් නැතිනම් ‘යෝධයෝ සහ ලොකු ඔළු’ කියා හැඳින්වෙන වෙනත් ලතින් උත්සවයකදී තරුණයින් පිරිසකගේ අලකලංචියක ප්‍රතිඵලයක් හැටියට තක්කාලි ගසා ගැනීමක් ඇති වූ බවත්, එතැන් සිට ඇවුරුද්ද පුරා සිරිතක් හැටියට විනෝදෙට එසේ කරගෙන ආ බව තමයි ඒ අය කියන්නේ.

දැන් නම් ප්‍රසිද්ධ ‘ලා ටොමටිනා’ උත්සවය නීති රිතී සහිතව පවත්වාගෙන යනවා. කාටවත් තුවාල නොවනු පිණිස පහරදීමට ඉඩ දී ඇත්තේ කලින් චප්ප කර ගත් තක්කාලිවලින් පමණයි. මේ සඳහා සහභාගී වන්නන් මඟ අවහිර නොකර වාහහනවලට ඉඩදීම අනිවාර්යයි. සෑම වසරකම දළ වශයෙන් මෙට්‍රික් ටොන් 40 ත් 100 ත් අතර ප්‍රමාණයක් බරට තක්කාලි මේ උත්සවය සඳහා භාවිත කරන බව කියැවෙන අතර ඒවා ඒ තරම මිල අධික නැති රසයෙන් අඩු ඒවා බවත් ඒ නගර වැසියන් කියනවා.

තක්කාලි ගැසීම ඇරැඹි බව දන්වා පැයකට පසු දෙවැනි වර කොකා ගස්සා බලධාරීන් දැනුම දුන් විට තක්කාලි විසි කිරීම සම්පූරන්යෙන්ම නතර කල යුතුයි. එසේ නොකළොත් තක්කාලි ගැසීමෙන් පසුව ඇරඹෙන අනෙක් ක්‍රීඩාවලට සහභාගී නොවී ඔබට පොලිස් කූඩුවේ ලගින්නට වෙනවා.

බියුනෝල් වැසියන් සමඟ තක්කාලි ගසා ගැනීමට වසරේ ලෝකය පුරා රටවල්වලින් සංචාරකයන් ඇදී එන බවත් සමාන්‍යයෙන් ‘ලා ටොමාටිනා’ උත්සවයට 40,000 ක පමණ පිරිසක් වාර්ෂිකව සහභාගී වන බව බලධාරීන් ඇස්තමේන්තු බලා ඇති බව ටෙලිග්‍රාෆ් පුවත් වෙබ් අඩවිය වාර්තා කරනවා.

තක්කාලි ගසා ගැනීම නිමා වූ පසු ගිනි නිවන ට්‍රක් රථ පැමිණ රතුපාට වූ නගරය සෝදා හැරිය පසු තක්කාලිවල ඇති අම්ල ගතිය නිසා බියුනෝල් නගරෙ මංපෙත් දිළිසෙන්න පිරිසිදු වෙනවාලු.

රන්දුනු බණ්ඩාර

දිනමිණ පුදුමයි ඒත් ඇත්තයි අතිරේකයෙන්