කවුරුත් බිය ගැන්වූ ටෙක්නිකල් හන්දිය - Technical junction

දිනය 1751 නොවැම්බර් 27 වැනිදාය. වේලාව පෙරවරු දෙකය.  දළ සහිත වල් ඇතෙකු  පවුර බිඳ ගෙන නගරය තුළට කඩා වැද ඇතැයි යන ආරංචිය දසත පැතිරිණි. දැනට රීගල් සිනමා ශාලාව තිබෙන තැන පිහිටි රොටර්ඩෑම් අට්ටාලයට පීරා ඇතුළු වූ හස්තියා එහි සිටි ආරක්ෂක සෙබළුන් දෙදෙනා ගෙන් එක් අයෙකු මරා අනෙකාගේ අත ඩැහැගත්තෙලු.

කොළඹ නිල වාර්තාවෙන්ම උපුටා දක්වන පහත සටහනෙන් එකල කොටුව අවට පැවැති පරිසර පද්ධති කෙබඳු ද යන්න අවබෝධ කර ගැනීම අපහසු නැත.

  ...මින් පසු ශ්‍රීමත් ආණ්ඩුකාරතුමා ආඥාවක් නිකුත් කළේය. ආඥාව වූයේ ඔවුන්ගේ තෝනි (ඔරු) නම් යාත්‍රා ද මාලදිවයින් යාත්‍රාකරුන් ඔවුන්ගේ බෝට්ටු ද දියත් කරමින් වල් ඇතා ග්‍රහණයට ගත යුතු බවයි. කඹ පිරවූ බෝට්ටුවක් ද මේ සඳහා ඔවුන්ට සපයන ලදි. දහවල් එක වන විට ඇතාගේ පස්සා කකුල් අල්ලා බැඳීමට හැකි විය. මෙහිදී තමා වෙළූ සියලුම බැමි බිඳ හස්තියා කැලේට රිංගා ගත්තේය..

(කොළොම්පුර පුරාවෘත්ත)

මේ සම්බන්ධයෙන් ආර්.එල්. බ්‍රෝහියර් මහතා මෙසේ නිගමනය කළ බව සිය ග්‍රන්ථයේ සඳහන් කරයි.

“මේ සිද්ධිය මඟින් එකල කොලොම්පුරයේ භූ ලක්ෂණය ද කිසියම් ප්‍රමාණයකට අනාවරණය වේ. නගරයේ උතුරු, නැගෙනහිර හා දකුණු දිශාවන්හි ගන කැලෑ පැතිරී තිබූ බව මෙයින් පැහැදිලිය.”


අද තාක්ෂණික විද්‍යාලය පිහිටා ඇති ස්ථානය හා ඒ අවට ද එකල කැලෑ ප්‍රදේශයක්ව තිබී ඇත. තාක්ෂණික විද්‍යාලය පිහිටා ඇති හන්දිය යන අදහසින් “ටෙක්නිකල් හන්දිය” ලෙසින් නම් වත් වී ඇත. 

ටෙක්නිකල් හන්දිය පිළිබඳ කේ.ජයතිලක ශූරීන්ට තිබූ මතකය නම් මේ ආකාරය.
“හතලිහ දශකයේ දී පවා ටෙක්නිකල් හන්දියෙන් යෑම ලේසි පහසු කටයුත්තක් වුණේ නැහැ. සවස හය හත වුණු හැටියේ ඒ අවට කැලෑවේ හැංගිලා ඉන්න හොරුන්ගෙන් බේරිලා යන්න හරිම අමාරුයි. හවසට ගාලු මුවදොර පැත්තේ ඇවිදලා ආපසු යනකොට අපි යන්නේ කමිසවල බොත්තම් ගලවාගෙනයි. කමිස ද සුළඟට විසිරෙන්න හැරලා පිස්සු හැදුණු එකකු වගේ තමයි ටෙක්නිකල් හන්දිය පසු කරන්න ඕනෙ. නැත්නම් හොරු අත මිට සූර ගන්නවා.” 

ටෙක්නිකල් හන්දිය එදා සොර සතුරන්ගෙන් ගහන වූ මූකලානක්ව තිබූ බව මින් පැහැදිලි කරුණකි.
අද නගරය ඉතා දියුණුවට පත්ව ඇත. බොහෝ ප්‍රදේශවලට යෑමට ටෙක්නිකල් හන්දිය පසු කළ යුතුය. අලුත්කඩේ උසාවිය පෙදෙසට ද කොළඹ-නුවර-මීගමුව ප්‍රදේශවලට ද බොරැල්ල-මරදානට ද, කොටුව-පිටකොටුව ආදී ප්‍රදේශ කරා යෑමට මේ ස්ථානය මඟීන්ට වැදගත්ය. 
ඒ වගේම කොළඹ නගරයට ප්‍රවිශ්ට වීමේ දී මේ හරහා ආ යුතු ය. එබැවින් කොළඹ නගරයට ඇතුළුවන මඟීන්  ටෙක්නිකල් හන්දිය හොඳින් හඳුන්වා ඇත.
එදා නම කියූ පමණින් කවුරුත් බිය ගැන් වූ ටෙක්නිකල් හන්දිය අද මනා අවබෝධයෙන් හා බුද්ධියෙන් යුතුව පසු කළ යුතු මං සන්ධියක් බව නම් පැවැසිය යුතුය.

ශ්‍යාමා සමරසිංහ

ඡායාරූප - නිශ්ශංක විජේරත්න