ස්ත්‍රියට මොළය දෙනු! - INTERNATIONAL WOMEN'S DAY 2014

හෙට දිනට (මාර්තු 8) යෙදෙන ජාත්‍යන්තර කාන්තා දිනය නිමිත්තෙන් වූ අපගේ දැක්ම

සේයාරුව ගූගල් වෙතිනි

ශ්‍රී ලාංකේය සමාජයේ හා සංස්කෘතියේ පදනම වන්නේ ස්ත්‍රිය මිස පුරුෂයා නො වේ. මේ පිළිබඳ නොයෙක් මතවාද, දර්ශන හා තර්ක ඇතත්; සත්‍යය තත්ත්වය එය ම වේ. පවුල් සංස්ථාවේ නායකත්වය හිමිවන්නේ ගෙදර අම්මාට ය. නැතහොත් අම්මාගේත් අම්මාට ය. රටේ මුළු ජනගහනයෙන් බහුතරය ස්ත්‍රී පක්ෂයට අයත් වේ. ඔවුන්ගේ ඡන්දය, ක්‍රියාකාරකම් හා සමාජ නායකත්වය මේ රට හසුරවන ප්‍රධාන බලවේගයක් බවට පත් ව තිබේ. එය කිසිවකුටත් උදුරාගත නො හැකි යථාර්ථයෙකි.

ඈත අතීතයේ සිට ම ශ්‍රී ලංකාවේ තත්ත්වය වූයේ ස්ත්‍රියට ගෞරවයෙන් සැලැකීම ය. අම්මා යන සංකල්පය වුව ඊට කදිම නිදසුනකි. අම්මා යනු වචනයක් පමණක් නො ව; ගැඹුරු සංකල්පයකි. මේ සංකල්පය වර්ධනය කළ එක ම රට ශ්‍රී ලංකාව බව ද මානව විද්‍යාඥයෝ පෙන්වා දෙති. මෙයින් පෙනී යන්නේ ස්ත්‍රීත්වය පිළිබඳ ගැඹුරු සංකල්පයක් මෙන් ම සූක්ෂ්ම වැටහීමක් ද ශ්‍රී ලාංකේය සමාජය තුළ පවතින බව ය.
අද අන්තර්ජාතික කාන්තා දිනය යි. මේ දිනය සමරනු වස්; විවිධ විකාර හා විච්චුම්බර රට පුරා සිදුවන්නට පුළුවන. කෙනෙක් කාන්තා විමුක්තිය ගැන කතා කරති. තව කෙනෙක් රටේ විමුක්තියට කාන්තාවගේ දායකත්වය ගැන කතා කරති. සමහරු පෙළපාලි යති. තව සමහරු සමානාත්මතාව ඉල්ලා සිටිති. තවත් සමහරු ගෘහස්ථ හිංසනයක් ගැන කතා කරති. මේ සියල්ල බොරු නො වේ. එහෙත් කාන්තාවගේ හෙවත් ගෘහණියකගේ අනාගත අභිවෘද්ධිය වෙනුවෙන් ඉහත කී බලවේග ශත පහක වැඩක් සිදු කරන්නේ නැත.
ඕනෑ ම රටක කාන්තාවන් සංවිධානය කිරීමට නොයෙක් සංවිධාන ඉදිරිපත් වෙති. ඇතැම් විට ඒ සඳහා ම ප්‍රසිද්ධ පුද්ගලයෝ ඉදිරිපත් වෙති. නරකක් නැත. කාන්තා විමුක්තිය සඳහා අවංක ලෙස ඉදිරිපත් ව කටයුතුවල යෙදෙන කෙ‍ෙනකුට මුළු රටේ ම සහයෝගය ලැබිය යුතු ය. ඔවුන්ගේ අපේක්ෂාව වනුයේ පුරුෂ වෛරයක් ගොඩනැඟීම හෝ ස්ත්‍රීවාදයක් පවත්වාගැනීම නො වේ. ස්ත්‍රීන්ගේ සුවිශේෂී ප්‍රශ්නවලට බුද්ධිමත් විසැඳුම් සැපැයීම ඔවුන්ගේ ඉලක්කය වේ.
ස්ත්‍රීන් විෂයයෙහි ඉදිරිපත් වන ඕනෑම පෙත්සමක්, පැමිණිල්ලක් විභාග කිරීම සඳහා අලුත් කොමිසමක් ද පත් කර තිබේ. මේ කොමිසමට ආණ්ඩු පක්ෂයේ පමණක් නො ව; විපක්ෂයේ ද කැපී පෙනෙන ස්ත්‍රී චරිත යොදාගෙන තිබේ. මේ කටයුත්ත ඉතා වැදගත් ය. ස්ත්‍රීනට පමණක් විශේෂ වූ ප්‍රශ්න තිබේ. ඒ හැරෙන්නට පොදු ප්‍රශ්නවලදී වැඩිපුර තැවෙන්නේ ද ස්ත්‍රී පක්ෂයම වේ. මේ හෙයින් කාන්තා සංවිධාන ගැන ද කාන්තා ඡන්ද ගැන ද, කාන්තාවන් වෙනුවෙන් පෙනී සිටින පුද්ගලයන් ගැන ද සොයා බැලීම වැදගත් ය.
ජාත්‍යන්තර කාන්තා දිනය යනු හොඳ හැටි කා බී ජෝගි නටා, සටන් පාඨ කිහිපයක් කියා විසුරුවා හැරීම නො වේ. සමිති සමාගම් වසා දැමීම ද නො වේ. තවත් කිසිවකුට තර්ජනය කිරීමක් ද නොවේ. මෙබඳු දිනයෙක සිදුවිය යුත්තේ බුද්ධිමය ලෙස කාන්තාවගේ ශක්තිය හා එකමුතුභාවය ඒකරාශී කරමින් අලුත් ගමනකට පිඹුරුපත් සකස් කර ගැනීම ය.
ස්ත්‍රීන් පිළිබඳ සත්‍යවාදී ප්‍රකාශනයක් නූතන සමාජ කතිකාව තුළ නැත. එබඳු කතිකාවක් ඇතිවීමේ ඉඩ හසර හා මංපෙත් ධනපති සමාජය විසින් ම අසුරා දමනු ලැබ තිබේ. කතිකාවට බොහෝ දෙනෙක් බිය වෙති. කතිකාවකින් ස්ත්‍රිය පිළිබඳ ශාරීරික හා මානසික දුර්මතයන් පහකළ හැකි ය. එවැන්නක් සිදුවුවහොත්; සාධු සම්මත චරිත එකින් - එක බිඳවැටෙනු ඇත. ඔවුන්ගේ ප්‍රයෝග හා වංචා වඩාත් විස්තීරණ ලෙස හෙළිදරව් වනු ඇත. මේ වනාහී ස්ත්‍රීවාදී වියමනක් නො ව; පුරුෂ උත්තමවාදී ප්‍රවාහයට දක්වන ප්‍රතිචාරයක් පමණි.
අද දකින්නට ලැබෙන විශේෂ දේශපාලන පසුබිම වන්නේ ඕනෑ ම විවේචනයකට ඇති ඉඩ-කඩ පුළුල්වීම ය. ස්ත්‍රීන් විෂයයෙහි ශ්‍රී ලංකාවේ තත්ත්වය පුළුල් වන්නට වූයේ මේ ක්‍රියාමාර්ගය නිසා ය. අපට නොයෙක් මතවාද තිබේ. නොයෙක් වැඩසටහන් තිබේ. එහෙත් ඒවායෙහි ප්‍රතිඵලයක් ලැබෙනතුරු කිසිවක් විශ්වාස කළ නො හැකි ය. මෙරට ස්ත්‍රීවාදී සමාජයට දිගින් දිගට ම එම අභියෝගයට මුහුණ දෙන්නට සිදු විය.
යුද්ධයක දී වඩාත් දුකට පත් වන්නේ කාන්තාව හා දරුවන් යැයි කියමනක් තිබේ. මේ වන විට ශ්‍රී ලංකාවේ යුද්ධයක් නැත. එහෙත් අදටත් ශ්‍රී ලංකාවේ වැඩියෙන් ම දුකට පත් ව ආතතියෙන් යුතුව ජීවන මඟට එකතු වී ඇත්තේ කාන්තාව ය. ඊළඟට දරුවන් ය. රටේ සිදුවන බරපතළ අපරාධ, හිංසන හා අපහරණයන් පිළිබඳ සැලැකිල්ල යොමු කරන විට එම තත්ත්වය පැහැදිලි වේ. අතීතයේදීත් එය සිදු විය. අදත් එය සිදු වේ. අනාගතයේදීත් එය සිදුවීමට ඉඩ තිබේ.
අද කාන්තාදිනය යැයි නො දන්නා ගැහැනු ද සිටිති. ඒ බව දැනගත්ත ද ප්‍රමාණවත් ශක්තියක් හා බලපෑමක් ‍නොමැති බැවින් කාන්තාවට කළ හැකි බලපෑම හා ආකර්ෂණය පහළ බැස තිබේ. මේවා වෙනස් විය යුතුය. කාන්තාවට ද පිරිමියකුට සේ ඉදිරියට යෑමට බාධාවක් නැත. එවැන්නක් අද ඇත්තේ ද නැත. කළ යුතු අපහසුම කාර්යය වන්නේ අපේ රටේ ගැහැනියට ඔළුව හෙවත් බුද්ධිය ලබාදීම ය.