මාත් දැන් බාසා වෙල්ලෙක් more people used google translate

සති කීපයක සිට මේ මාතෘකාව පිළිබඳ ලියන්නට සිතා සිටිය ද එය දිනෙන් දින කල් දැමිණි. විටෙක මෙය නොලියපන් යැයි මගේ සිතම මට දෙස් දුණි. ඒත් ඕන ප්‍රශ්චාත් භාගයක් වෙද්දෙන් මෙය ලියනවා අද කියා සිතුණු බැවින් මෙය ලියමි.

බාසා වෙල්ලා යනු දෙපිට තේරුම් ඇති වදනෙකි. බොහෝවිට අරුත් සුන් වුව මෙ වදන වහරන්නේ භාෂාවන් ගණනාවක් හසුරුවන්නට හැකියාවැති පුද්ගලයන් හදුන්වන්නට ය. හුදෙක් එය විනෝදාත්මක හැඳින්වීමකි. 
දෙවැනි අරුත නම් පද පෙරැළියකි. එය තේරුම් කොට දිය යුත්තක් නොවේ. පහේ පන්තියේ එකා පවා එය දනී.

සිංහල බ්ලොග් ලියන බොහෝ දෙනකු ඉංගිරිසි බසින්ද පෙළහර දක්වති. එය අරුමයක් නොවේ. එහෙත් සිංහල ඉංගිරිසි දෙභාෂාව ට අමතරව වෙනත් භාෂාවන්ගෙන් ශිල්ප දක්වන්නෝ ද සිටිත්. කෙන්ජි මෙන්ම අපූර්විද පිළිවෙළින් ජපන් බසින් හා හීබෘ බසින් කමෙන්ට් හරහා මෙන්ම බ්ලොග් සටහන් තුළ ද වදන් හරඹ පාති. ඒ ඔවුන් දෙදෙනාම එ රටවල් හි කාලයක් තිස්සේ දිවි ගෙවන නිසාවෙනි. 
එවන් වදන් දකින සැමදා මට ඇතිවුණු සිතිවිල්ලකි “අනේ මටත් හැකිනම් මේ වැඩේ කරන්න“ යන්නයි. වරක් දෙවරක් උත්සාහ කළද එය අසාර්ථක විනි. තවත් කෙනකුගෙන් අසා ඉඳහිට ජපන් වදනක් අහුලා සිංහලෙන් කොටා කෙන්ජාට කමෙන්ට් කළ අවස්ථා ද විය. එය කෙන්ජයියාගේ උත්තරවලට ප්‍රති උත්තර දෙන්න මට නොහැකි විය.

ඔය අතර දී ජාලයේ කරක් ගසද්දී යි මට ගූගල් පරිවර්තකය හමුවන්නේ. ලොව භාවිත වන භාෂාවන් ගනනාවකට අපට අවැසි වාක්‍යයන් පරිවර්තනය කරගන්නට ඉන් හැකිය. එය සියයට සියයක් නිවැරදිම පරිවර්තනයක් නොවුව ද අපට කියන්නට ඕනෑ අදහස කිය හැකි කදිම මෙවලමකි. ඒ මෙවලම මෙතැනින් ගන්න. 

මේය අත පත ගගා ඉන්නා විට මුහුණු පොතේ ජපන් යුවතියක් සිටිනු දුටුවෙමි. මගේ කුපාඩි සිත කීවේ ඇය අන්දපන් කියා ය. අර පරිවර්තකයේ පිහිටෙන් ජපන් අකුරින් ඇයට කෙටි පනිවුඩයක් දැම්මෙමි. වැඩේ ගොඩය. ජපන් බසින්ම පිළිතුරු ලැබිණි. විගස එය නැවත පරිවර්තනය කොට මම ජපන් ඉගන ගන්න උත්සාහකරන සිංහලයෙක් බව දැන්වුවෙමි.  දැන් වැඩේ ගොඩේ ගොඩය. ඉන් නොනැවතුනු මම තවත් භාෂා කීපයක්ම අත්හදා බැලුවෙමි. එයද 
ගොඩය. 
ඔන්න ඔහොමයි මං බාසා වෙල්ලෙක් වුණේ. දැන් කාටත් පුළුවන් මං වගේ බාස වෙල්ලෙක් වෙන්න අර ක්‍රමයට පිං සිද්ධ වෙන්න.

මේ මෙවලමත් එක්ක ජිල්මාට් දමමින් ඉන්න විටය අපේ පොඩි කෙළී කටුස්සට ඉංගිරිසියෙන් කියන්නේ කුමක් දැයි අසමින් මා ළග දැවටෙන්න වුණේ. 
අප්පට සිරි මාත් දන්නේ නෑනේ කටුස්සට කියන ඉංගිරිසි වදන. යන්තං මධුර දෙයියන්ට පින් දීල හොයාගත්තා වචනේ chameleon.දාල බැලුව ජපන්වලට カメレオン මෙන්න බඩු. එය උච්චාරණය වන්නේ Kamereon කියලයි. මෙන්න හීබෘ බසින් זקית
මෙන්න ලතින් බසින් stellio.

ඉතින් එතැනින් නොනැවතුනු කෙල්ල කටුස්සා ගැන විස්තරත් අහනවා... පොඩි එකීනේ ඉතින් බොහොම සරලව මං කියල දුන්නා එයාට කටුස්සා කියන්නේ ජීවත් වෙන පරිසරයට අනුව වෙනස් වෙන සතෙක් කියලා. හැම තිස්සේම පාට මාරු කරන බවත් කියල දුන්නා. ඒ විතරක් නොවේ වත්තට ගිහින් තැන් දෙකක හිටපු කටුස්සෝ පෙන්නලා මං කියන වෙනසත් පෙන්නලා දුන්නා.

ආයිමත් මට හිතුණා මේ ගූගල් පරිවර්තකය හන්දා මාත් කටුස්සෙක් වෙයිද කියලත්.