සයිබරයේ අනංගයන් සොයා මෙහෙයුම්

මේ වන විට අන්තර් ජාලය හරහා අපරාධ රැල්ලක් ක්‍රියාත්මක වන බව පොලිස් දෙපාර්තමේන්තුව පවසයි. ඒ සම්බන්ධයෙන් නිතිපතා ලැබෙන පැමිණිලි  හේතුවෙන්, කාන්තාවන් බියවද්දා ලිංගික අල්ලස් හා කප්පම් ලබා ගන්නා පරිගණක අපරාධකරුවන් රහසිගතව අත්අඩංගුවට ගැනීමේ ව්ශේෂ වැඩපිළිවෙළක් අපරාධ පරීක්ෂණ දෙපාර්තමේන්තුව මගින් දියත් කර ඇත.

අපරාධයට වරක් ගොදුරුවන කාන්තාව නැවත නැවත විවිධ අපරාධ වලට ගොදුරු කර ගැනීම මේ අපරාධකරුවන්ගේ ලක්ෂණ වන අතර තම අනන්‍යතාව හෙළිවෙතැයි බියෙන් වින්දිත කාන්තාව පොලිසියට පැමිණිළි නොකිරීම වැරැදිකරු නීතියේ රැහැනට හසුනොවීමට හේතු වී ඇතැයි රහස් පොලිසිය පවසයි.

මේ නිසා ‍එවැනි කාන්තාවන්ගේ රහස්‍ය භාවය ආරක්ෂා කර ගනිමින් අපරාධකරුවන් අත්අඩංගුවට ගෙන අධිකරණ ක්‍රියාමාර්ග ගැනීමට රහස්පොලිසිය කටයුතු කරයි. මේ වෙනුවෙන් ක්‍රියාත්මක වැඩපිළිවෙළ අනුව අන්තර් ජාලය හරහා ක්‍රියාත්මක අපරාධකරුවන් අත්අඩංගුවට ගැනීමට අපරාධ පරීක්ෂණ දෙපාර්ත මේන්තුවේ පරිගණක අපරාධ අංශය පැය විසිහතර පුරා ක්‍රියාත්මකය.

සුරූපි විවාහක කතුන් හා ලාබාල තරුණියන් මෙවැනි අපරාධ වලට ගොදුරුවන බවත් වැඩි වශයෙන් වයස අවුරුදු දාහතර විසි හතර අතර තරුණියන් මේ අපරාධවලට රවටාගෙන ඇති බවටත් පරීක්ෂණ මගින් හෙළිව තිබේ.

මුලින් ‍අපරාධකරුවා පෙම් කරන මුවාවෙන් කාන්තාවන් රවටා විවිධ ලිංගික ක්‍රියාවලට යොදා ගෙන රහසේ රූපගත කර හෝ වීඩියෝ කර අතහැර දමා නැවත අවශ්‍යතාවක් වූවිට හෝ ඔහුගේ මිතුරකු වෙනුවෙන් ලිංගිකව එක්වීමට බලකර කත ඊට අකමැති වූ විට රූගත කළ දර්ශන අන්තර්ජාලයේ ප්‍රසිද්ධ කරන බව පවසා දීර්ඝ කාලීන ලෙස ලිංගික අවශ්‍යතා සපුරා ගැනීමට යොදා ගන්නා බව ට තොරතුරු අණාවරණය වී ඇත.

මෙසේ බිය ගන්වා මුදල් ලබා ගන්නා අපරාධකරුවන් ද සිටින බව රහස් පොලිසිය පවසයි.
මෙවන් අතවරයකට ලක්ව ඇත්නම් නොපමාව පහත අංක අමතන්න
පරිගණක අපරාධ අංශය - 2326976
ජේෂ්ඨ පොලිස් අධිකාරි පරිගණක අපරාධ අංශය - 2447319
නියෝජ්‍ය පොලිස්පති පරිගණක අපරාධ අංශය - 2328138