බොගලේගම අන්දරය

පිංතුරය ගත්තේ මෙතැනින්

එය බොහොම ලස්සන ගම්මානයකි. අනෙක් හැම ගමක ම වගේ ගැමි සුන්දරත්වය, ගැමි සුවඳ, ගැමි ගඳ, වැනි හැම දේම මේ ගම්මානයේ ද අඩු වැඩි ලෙස තිබේ.  වරදවා හිතන්න එපා අර උදාගම් සංකල්පෙත් එක්ක කරලියට ආ  ගමක් නම් නොවේ මේ ගම. 
අනෙක් ගමක් හා අප මේ කියන ගම අතර ඇති ලොකුම වෙනස නම් මේ ගමට භූමි පුත්‍රයන් නොමැති වීමයි. ලොව කොතැනක සිටිනා කෙනෙකුට වුව මේ ගමේ ඉඩං කෑල්ලක් තමන් සතු කරගන්න ට එක සතයකුදු වියදම් නොවේ. ගමේ පදිංචියට කැමැති ඕනෑම කෙනෙකු කළ යුත්තේ ඕනැම තැනකින් ඉඩං කට්ටියක් කොටු කර ගෙන තම අනන්‍යතාව හැගවෙන පුවරුවක් එල්ලා ගැනීම පමණයි. තම ඉඩං කට්ටිය තමන්ට කැමැති ඕනැම තැනකින් වෙන්කර ගන්නට ද හැකියාව ඇත. එසේ තම තමන්ට ඉඩං කට්ටි වෙන්කොට ගත් බොහෝ දෙනෙක් සතුටින්, සාමයෙන්, වලියෙන්, මේ ගමේ දිවි ගෙවති.

මේ ගමේ දිවි ගෙවන ජනී ජනයා ගේ එකම විනෝදාංශය වගාවයි. සමහරු මල් වවති, සමහරු මහානර්ඝ ඔසු පැළ වවති, තවත් අය විෂ පැළෑටි ද වවති. තවත් අය මනරම් ලතාවන් වවති. තමන්ට රිසි සේ හැමෝම හැකි පමණනින් මොනවා හෝ වවති. වගාවෙන් පෝෂිත මෙ'ගම ලස්සන වීම ඉතින් අරුමයක් ද?
කවුරුන් කොහොම වගා කළත් ඒ වගාවන් ට සාත්තු සප්පායම් කරන්නට සෙස්සෝ සැහැදී පැහැදී සිටිති. ඇතැම්හු අනෙකා ගේ වගාවට පොහොර දමති, ජලය ඉසිති. ඇතැමෙක් අනෙකකු ගේ වගාවට මිනිස් වසුරු දමා යන අවස්ථා ද නැත්තේ නොවේ. බොහෝ විට එවන් දෑ කරන්නේ සැඟවී සිටිමින් ය.

මෙ'ගම් හි වැස්සන් සතු තවත් සුවිශේෂී ම ලක්ෂණය නම් නොපෙනී සිටින්න ට ඇති හැකියාවයි. කැමැති අය පෙනෙන්න ට ආවත් ඇතැම්හු නොපෙනී සිටිති. නොපෙනී සිටිමින් වගාවන් හි පෝෂණයට උර දෙන්නෝ ද සිටිති.
මේ අතර ගම් වැස්සන් නොවන පිරිස් ද පැමිණ වගාවන්ට අත හිත දෙන අයුරු ද දැක ගත හැකි ය. ඒ අතර වගා වනසන්නන් ද නැත්තේ නොවේ.

බොහෝ විට වන්නේ ගම් වැස්සන් නොවන පිරිස් වගාවන්ට උදව් පදව් කරමින් සිට පසුව මෙ'ගමේ ඉඩම් කට්ටියක හිමි කරුවකු හෝ කාරියක බවට පත් වීමයි. එසේ සාර්ථක වූ බොහෝ පිරිස් මේ ගමේ දී අපට අද ද  දැකගත හැකි ය.

වගාවට ආධුනිකයන් ට පරිණත වගාකරුවන් බොහෝ ආධාර උපකාර කරන අවස්ථා ද ඇත. එවන් උදව් පදව් ලද අය පසුව තමනට උදව් කළ උන්ගේ වගාවකට තෙලක් පෝරක් ඉසිනවා තබා කොරටුව දෙසවත් නොබලන අවස්ථා ද තිබේ. කොහොමත් මේ වගාව සහජීවනයෙන් යුතුව කළ යුතු දෙයක් බව වටහා ගත් ගම් වැස්සෝ සාර්ථකව වගා කටයුතු කරගන කල් ගෙවති.
දැන් ඔබට මහත් වූ කුතුහලයක් ඇති බව මම දනිමි. මොකද්ද මේ ගම.... ඔව් ඔබ මේ කියෙව්වේ බොගලේගම අන්දරයයි......