සයිබර් උළෙලට පාර කැපුණේ මෙහෙමයි Cyber Mega Beach Party

සයිබර් අවකාශයේ (මා සහභාගී වූ) පළමු හමුව පැවතියේ ගම්පහ මල්වත්තේ ය. එයට මා ගියේ ආධුනික බ්ලොග් කරුවෙකු ලෙස ය. සොඳුරු බ්ලොග් කරුවන් රැසක්ම එහිදී මට හඳුනා ගන්නට ලැබිණි. එදා ඇතිවුණු මිතු දම මේ වන විට දැඩි ලෙසින් තහවුරුව ඇත. අනතුරුව මහරගම පැවැති අවුරුදු උත්සවයට ද එක් වන්නට තරම් මම වාසනාවන්ත වූයෙමි. එම උලෙළින් අනතුරුව ගෙවී ගිය කාලය දීර්ඝ බවක් දැනෙන්නට විය. 
දිනක් මුහුණු පොතේ සැරිසරන අතර තුර රනා හා ප්‍රදීප් ට මම ඒ බැව් පැවසීමි. ගල්කිස්සේ පැවැති සුහද හමුවට පාර කැපුණේ එතැන් සිට ය. 
රනා හා ප්‍රදීප් දෙදෙනාම සුහද හමුවක් පවත්වන්නට එක හෙළා කැමැත්ත පළ කෙළේ ය. වහා ක්‍රියාත්මක වූ ප්‍රදීප් ඒ සම්බන්ධයෙන් මුහුණු පොතේ පිටුවක් විවර කෙළේ ය. දින දෙකක් ගත වීමටත් මත්තෙන් එහි සාමාජිකත්වය 309ක් විය. අදහස් යෝජනා බොහොමයක් විය. ඒ සියලු කතා බහ මැද අවසානයේ ප්‍රදීප් විසින් සංවිධායක මඩුල්ල පත් කළේ ය. 

මේ ඒ සටහනයි.

Pradeep Chandana Gunarathne :

අවසාන තීරණය - බොහෝ දෙනාගේ ඉල්ලීම පරිදි Mage Maranaya ගේ ඉල්ලා අස්වීම ප්‍රතික්ෂේප කරන ලද අතර Naleen Dilruksha මහතා විසින් ඉදිරිපත් කල හේතු සාධාරණ නොවන බැවින් ප්‍රතික්ෂේප කරන ලදී. රෙප් මහත්තයා හෙවත් අරුණ හෙට්ටිආරච්චි දැනට කොළඹින් බොහෝ දුර බැහැර සිටින බැවින් මෙම සංවිධායක මණ්ඩලයට ඇතුළත් නොකරන ලදී. එහෙත් අලුතින් Gayan Sampath Gunawardana සහ Neranji Ekanayake පත් කරන ලදී. මෙහිදී ප්‍රායෝගිකව වැඩ වල යෙදීම මෙන්ම අදහස් හා තමන්ට හැකි ආකාරයේ දායකත්වයන් ලබා දීම ද වැදගත් බැවින් කාර්යබහුල බව නිසා සංවිධායක මණ්ඩලයට එක්වීම ප්‍රතික්ෂේප කළ සාමාජිකයන් හැකි ආකාරයකින් දායකත්වය දක්වනු ඇතැයි අපේක්ෂා කරනු ලැබේ. ඒ අනුව පහත දැක්වෙන සංවිධායක මණ්ඩලය පත් කර ඇති අතර ඔවුන් වෙනුවෙන් වෙනමම සාකච්ඡා මණ්ඩපයක් සකස් කර ඇත. එහිදි ගන්නා තීරණ පසුව බ්ලොග් අවකාශයේ මිතුරෝ නිල බ්ලොග් අඩවිය මගින් ප්‍රකාශයට පත් කරනු ලැබේ. එබැවින් හෙට (08) ප.ව. 8.00 ට මෙම ගෘප් එක වසා දමනු ලැබේ.

01. නලීන් දිල්රුක්ෂ
02. රසික නානායක්කාර (රනා)
03. මගේ මරණය
04. සුභාෂ් දිල්රුක් කන්නංගර (සුදීක)
05. චතුරිකා දුලාංජලී (චතුමිතු)
06. චමීර දේද්දුවගේ
07. ගයාන් පෙරේරා
08. තරිඳු අබේසිංහ
09.සමින්දික ශ්‍රීමන්ත පෙරේරා (සෑම්)
10. සිතුම් පැතුම්
11. මුදියා නොහොත් සමියා
12. ගයාන් සම්පත් ගුණවර්ධන (ගුනේ)
13. නෙරංජි ඒකනායක

එතැන් පටන් ලහි ලහියේ සංවිධාන කටයුතු සිදු වෙන්නට විය. ඒ අනුව ලෝගෝව නිර්මාණය බාර වුයේ ලීෂාන් පුවක්ඕවිට සොයුරාටයි. ඔහු ඉතාමත් සිත් ගන්නා අයුරින් එය ඉටුකොට දෙන ලදී. බස් රේඩියෝවේ සාමාජිකයින් නිල ප්‍රචාරකත්වය භාර ගත්තේ ය. සියලු ලේඛන කටයුතු නිරංජිටත් මුදියාටත් ප්‍රදීප්ටත් භාර විය. බස් සාමාජිකයන් ඉතා මැනවින් ප්‍රචාරක කටයුත්ත මෙහෙය වූ අතර නිරංජි සියලු ලිපි සකස් කෙළේ ය. අවසානය වන විට සංවිධායක කමිටුව තවත් පුළුල් විය. අලුතින් එයට පහත සඳහන් සාමාජිකයන් ද ඇතුළත් කරන ලදී.

14 අසන්ක සෙනවිරත්න
15 තිසර මධුවන්ත
16 තිළින ෂෙහාන්
17 දුලිප් සිකුරාජපති
18 රුවන් රංගනාත්
19 සමින්දික ශ්‍රීමන්ත 
20 හර්ෂණ අධිකාරි 
21 ලක්මාල් කන්දේවිදාන
22 ප්‍රදීප් චන්දන ගුණවර්ධන

කමිටුව තුළ පැවැති සංවාද ගණනාවකින් පසු අවසන සාදය ගල්කිස්සට තීන්දු විය. තැන සොයන බර රනාට සුදීකට හා දුලිප්ට පැවරිණි. එදින පවත්වන තරඟ පිළිබඳ වගකීම අසංක සෙනවිරත්නට භාර කැරිණි. 

මේ අතර එක් දිනක සුන්දර හවස්වරුවක අපි කීපදෙනෙක්ම ගල්කිස්සට ගොස් තැන ගැන සොයා බලා සංවිධාන කටයුතු ගැන සාකච්ඡාවක් ද පැවැත්වූයෙමු. එය අවසන් වූයේ පුංචි පහේ සාජ්ජයක් ද සමගිනි. සංවිධායක මඩුල්ලට අමතරව තවත් බ්ලොග් මිතුරන් කීප දෙනෙකුම එදින අප හා එක්වූහ. ඔවුන්ගෙන්ද අපට බොහෝ වැදගත් දේ ලැබිණි. මේ අයුරිනි ඔබ වින්දනයක් ලැබුවා වූ බ්ලොග් ලියන්නන්ගේ මහා බීච් පාටිය නිර්මාණය වූයේ.

මේ දවසේ එතැනට එන පැරණිම බ්ලොග් සාමාජිකයාගේ සිට නවකයා දක්වා වූ සෑම දෙනාට ම එකසේ පිළිගැනිමක් දෙන්නට සැමවිටම අපේ කණ්ඩායම සැහැදී පැහැදී සිටියේ ය. 
වෙනත් බ්ලොග් සාදයන් හිදී පැවැති කණ්ඩායම් ගැසීම වෙනුවට සැවොම එකට යන ආකල්පයෙන් සියල්ල සිදු කැරිණි. වෙනදා තැන තැන ඇතිවන මල් පැණි සාද වෙනුවට මෙදා තිබුණේ එකම මේසයකී. සියල්ල එතැනය. එකට ය. පොඩි එවුන් මුලදී ටිකක් ඇඹරුන ද මොහොතකින් එය මග හැරිණි.

සංවිධායක මඩුල්ලේ නොසිටියත් එදින හා පෙර කතිකාවන් හි දි පටන් අපට අයෝමය ශක්තියක් ගෙනදුන් බ්ලොග් කලාවට අමිල මෙහෙවරක් කළ වැප් නිශාන්ත හා ප්‍රවීන් ඉන්ද්‍රනාම දෙදෙනාට ම මේ මොහොතේ හදපිරි තුටින් ස්තුතිය පුද කරමි. එසේම සාගර ද සිල්වා සොයුරාගේ දායකත්වයට ද තුති පිරි නමමි.

පටන් ගන්නාවිට 309 දෙනකු සාදයකට කැමැත්ත පළ කළ ද අවසානයේ 205ක් නියමිත පෝරමය පුරවා පැමිණෙන බව තහවුරු කොට තිබිණි. එහෙත් අවාසනාවට පැමිණ තිබුණේ 123දෙනෙකි. ඒ කෙසේ වෙතත් සාදය ගැන බොහෝ දෑ මේවනවිට ලියැවී හමාරය. ඒ සියල්ල සාදයේ ගුණ වරුණා ය. ගුණ නොව අගුණ ද පවසන්න. ඒ මන්ද යත් ඉදිරියේ කෙරෙන වැඩ කටයුත්තකට වුව ඒවා ආදර්ශයට ගත හැකි බැවිනි. 
අවසන් ව අපට අනුග්‍රහයක් දැක්වූ මා මිතුරු සමුපකාර අමාත්‍යංශයේ මාධ්‍ය ලේකම් නිපුන් ඒකනායක සොයුරාට මගේ ප්‍රණාමය පුදකරන අතර මේ උලෙළ සාර්ථක කරගන්නට දායකත්වය දැක්වූ ඔබ සෑම දෙනාටම හිස නමා ආචාර කරමි.