ඉපැරැණි පුස්කොළ පොතකින් සිංහල වෙදකම - ප්‍රතිකාර නොමිලේ

පුස්කොළ පොත පරිශීලනය කරන පද්මසිරි වෙද මහතා

සිංහල නාඩි වෙදකම පිළිබඳ කලින් ලියූ පොස්ටුව ට ලද ප්‍රතිචාර හේතුවෙන් එවැනිම තවත් වෙද මහතකු පිළිබඳ මේ සටහන තබමි. මේ සටහන මා වෙත මිට වසර කිපයකට පෙර යොමු කළේ ඉමදූවේ මුනිදාස මිතුරා ය. මේ සටහන එකල දිනමිණ පුවත් පතේ ප්‍රාදේශීය පුටුවකට යොමු කරන ලදී.
මේ වෙද මහතා පිළිබඳ වැඩි තොරතුරු සහෘද මාතලන් සොයුරා දන්නවා ඇතැයි අනුමාන කරමි. මන්ද යත් ඔහුද දකුණු ලක වැසියෙකු බැවිනි.


‘වේද සතර ආරක්ෂා කළෙන් මතු පරපුර දැනුවත් විය යුත්තේය’ යැයි සඳහන් පිටු පන්සිය අසූ අටකින් (588) යුත් මහා පුස්කොළ පොතක් ගෝනගලපුර දොඹගහවත්තේ බී. එම්. පද්මසිරි වෙද මහතා සතුව ඇත. 

පිය උරුමයෙන් ලද ඉපැරැණි මහා පුස්කොළ පොත

මේ පුස්කොළ පොතේ මිනිසාගේ සර්වාංගයේ හට ගන්නා ඕනෑම රෝගයකට ප්‍රතිකාර මෙන්ම ඖෂධ මෙන්ම එම ඖෂධ නිවැරැදිව නිපදවා ගන්නා හැටිද සඳහන් වේ. ඒ අනුව ඖෂධ වර්ග නිපදවා තමන් වෙත පැමිණෙන රෝගී ජනතාවට නොමිලේ වෛද්‍ය ප්‍රතිකාර ලබාදීමට පද්මසිරි වෙද මහතාගේ ‘පද්මසිරි මැදුර’ දවසේ පැය විසි හතර පුරාම විවෘතව පවතී.
විවිධ රෝගාබාධයන්ට ප්‍රතිකාර ලබාදීම පමණක් නොව දරුවන් නොමැතිව මානසික පීඩාවන්ට ලක් වී සිටින අයට දරු පල ලබාදීමට ඖෂධ හා වත් පිළිවෙත් ද මේ පුස්තකයෙහි ඇති බව ඔහු පවසයි. පාසල් දරුවන්ට ඥාන ශක්තිය, මතක ශක්තිය හා ශරීර ශක්තිය වර්ධනය කර ගැනීමට තෙල් බේත් ප්‍රතිකාර හා පිළිවෙත් ද සර්වාංග රෝග හා දෝෂ අපල දුරුවීමට විවිධාකාර පිළිවෙත් ද එහි සඳහන්ව පවතී.
පද්මසිරි වෙද මහතාගේ ගෙවත්තේ ද විවිධාකාර ඔසු පැළ වවා ඇත. පුස්තකයෙහි සඳහන් පරිදි අමු ඖෂධ පැළෑටි සොයා ගෙන ඒවා කපා කොටා වියළා ඖෂධ නිපදවන්නේ ද ඔහුගේ අනු දැනුම යටතේම ය. බෙහෙත් හා තෙල් වර්ග ලබාදීමට අවශ්‍ය බෝතල් ද සිය වියදමෙන් ගෙන එන බවත් ඔහු පවසයි.
යහපත් සමාජයකට ශක්තිමත් දූ දරුවන් අවශ්‍යයි. ඒ සඳහා ඔවුන්ට සිංහල ආහාර වර්ග මෙන්ම සිංහල බේත් හා ඖෂධ වර්ග ද පුරුදු පුහුණු කළ යුතු යි. අරිෂ්ඨ, ආසව, කල්ක, තෙල් වර්ග මම නිපදවනවා. පොතු කබර, සුදු කබර, අර්ශස්, පීනස්, උඳු ගොව්වා කෑම වැනි ඕනෑම රෝගයක් සුවපත් කළ හැකි යැයි ඒ මහතා පැවසී ය.
පද්මසිරි මහතා කෘෂිකර්ම දෙපාර්තමේන්තුවේ ලියාපදිංචි වී ඇති ගොවියෙකි’ දකුණු පළාතේ ගොවි ජනතාවට යළ මහ දෙකන්නයටම නුමුහුන් පැරණි ගම්බද වී වර්ග බීජ ලෙස සකස් කර දීම 1965 සිට ඔහු අතින් සිදු වේ.
අනුරුද්ධ පද්මසිරි මහතා මීට  පෙර වී වගා ආදර්ශන යායක් වපුරා වීකිලෝ එකකින් කිලෝ විස්සක වාර්තාගත අස්වැන්නක් ලබා ගත් අයෙකි. කාබනික පොහොර යෙදීමෙන් එම අස්වැන්න ලබා ඇති අතර ගොම පෝර කුකුළු පෝර හා දහයියා ඒ සඳහා යොදා ගෙන ඇත.
මෙම ගෙවත්තේ පිටු පස ගොම යොදා නිපදවන ජීව වායු ඒකකයක්ද ඇත.
වෛද්‍ය ශාස්ත්‍රය, කෘෂිකර්මය. නංවාලීම සඳහා ඇප කැප වී ක්‍රියා කරමින් වැදගත් සමාජ මෙහෙවරකද නිරත වන පද්මසිරි වෙද මහතා තමන්ට පිය උරුමයෙන් හිමි වී ඇති මහා පුස්කොළ පොත මගින් රට පුරා විශාල පිරිසකට සුව සෙත සලසා දීමට කටයුතු කිරීම ප්‍රශංසනීය ක්‍රියාවක් බව ඔහුගෙන් ප්‍රතිකාර ලබා සුවපත් වූ කීප දෙනෙක්ම පැවසුහ.

ඉමදුවේ ඇම්. ජී. මුනිදාස