ස්ත්‍රීවාදය - බ්ලොග් ලියන්නියෝ සහ කාන්තා දිනය කෙසේ අරුත් බර කරමුද?

අනෙක් කතුනට උපකාර නොකරන කාන්තාවන්හට අපායේ සුවිශේෂි ස්ථානයක් වෙන්ව තිබේ යන මාතෘකාව යටතේ මා කාන්තා දිනය වෙනුවෙන් මෙයට පෙර දා සමකය වටේ බ්ලොග් අඩවියට ලිපියක් එක් කළේ බ්ලොග් ලෝකයේ ම සිදු වූ එක්තරා සිද්ධියක් මුල් කොට ගෙන ය.

එහෙත් එම ලිපිය නොසිතූ ඉසව්වක් කරා ඇදගන යන්නට ප්‍රතිචාර සමත්ව තිබේ.

එම ලිපිය අරබයා ස්ත්‍රීවාදය, ප්‍රමුදි, මාතලන්, හිරු, දුලන්ත, පුංචි කුමාරිහාමි ඇති කළ සංවාදාත්මක කතිකාව හේතුවෙන් මේ පසු සටහන තබමි.


පසුගිය දිනෙක බ්ලොග් ලියන සොයුරියක් තවත් බ්ලොග් ලියන සොයුරියක ගේ නූ ගුණ කියමින් පෝස්ටුවක් දමා තිබිණි. එම පෝස්ටුව මා සිත කම්පනයකට ලක් කළ ලියැවිල්ලකි. මෙතැන දී මා මේ දෙදනාගෙන් කවුරුන් නිවැරදි ද යන්න විමසන්නට උත්සාහයක් නොගනිමි. එසේම සිතේ හට ගත් කම්පනය හේතුවෙන් එතැන වදනක් හෝ නො පවසා නිහඬ වූයෙමි.
එහෙත් ඒ පෝස්ටුව නිර්නාමික පිරිස විසින් රිසිසේ විනෝද වන්නට පිටියක් සේ සකසා ගනු ලැබ තිබුණේ ය.
අවසන සිදු වූයේ ලිපිය ලියූ තැනැත්තිය සේම ඇගේ පස මිතුරිය ද නිරුවත් කරන්න ට අවශේෂ ලෝකයාට ඉඩ කඩ විවර කර දීම පමණකි.
හෙට අප කාන්තා දිනයට පා තබන්නේ සිංහල බ්ලොග් ලෝකයේ කාන්තාවන් එවන් තැනකට පත්ව තිබෛන මොහොතක ය.

එකි ලිපිය වෙනුවෙන් ලියැවුණු කමෙන්ටු අතර අව්‍යජව ලියු සටහනක් තිබුණි. ඒ නිරංජි සුලක්ඛනා ගේ පිළිතුරයි. ඇයට මගේ ආචාරය. නිරංජිගේ සටහනින් මොහොතකට පසු හෝ සත්‍ය තේරුම් ගෙන එකී පෝස්ටුව ඉවත් කිරීම ගැන එහි හිමි කාරියටද තුති පුදමි.
එහෙත් ඒ වන විට පෙරහර ගොස් අවසන් ය.

දැන් මගේ පෝස්ටුව හරහා ඇති කළ  ප්‍රතිචාර කතිකාව දෙස ට නෙත් යොමු කරමි.

සත්‍ය ලෙසම අපේ රටේ බටහිර ස්ත්‍රීවාදයක් මුල් බැස ගෙන තිබේ ද? සමස්ථ ස්ත්‍රී ජනගහනයත් සමග ගත් කළ එසේ නැතැයි යන්න මගේ වැටහීමයි.

දෙවැන්න එසේ නැති දෙයක් ඇතැයි කියමින් අප එවන් පරිසරයක් නිර්මාණය කරන්නේ ඇයි.

එයත් එන් ජී ඕ කුමන්ත්‍රණයක ප්‍රතිඵල ද?

මට වැටහෙනා පරිදි අපේ කාන්තාවන් මේ ඉල්ලන්නේ සම තැනක් නොවේ. හිමි තැන යි.

ඔවුන්ට අහිමි කොට ඇති තැනයි. මිනිසත් බවේ නාමයෙන් කාන්තාවට ද තීන්දු තීරණ ගැනීමේ බලයක් ඇයට ලැබිය යුතුයි.  එය ඔවුන් ට හිමි විය යුතුම ය.

//කාන්තාවන් කරන්න ඕනේ හැකිතාක් පිරිමින් කරන කරන දේ කරන්න නොයා තමන්ටම සුවිශේෂී විදිහට හිතල කාන්තාවන්ටම විශේෂ වන ක්‍රියාකාරකම් පද්ධතියක් ගොඩනගාගැනීමයි. ඉහමොළයක් ඇති පිරිමින් කළයුත්තේ ඒ සඳහා නියම ස්වභාවික ස්ත්‍රී හැඟීම් දැනීම් තිහිබෙන කාන්තාවන්ට නිසි සහයෝගය ලබාදීමයි.//- දුලන්ත

මෙන්න මෙතැන දී මා දුලන්තගේ මතයට ගරු කරමි.

එසේම පිරිමියා හා කාන්තාව අතර ජීව විද්‍යාත්මකව විමසා බැලීම ද වටි. කාන්තාවක් නිර්මාණය වී ඇත්තේ ඇයට ම සුවිශේෂි වු කර්තව්‍යයන් ඉටු කිරීමට වඩාත් පහසු ලෙසය.

එය එසේ වුයේ යැයි කිසිසේත්ම ඇය ව කොටු කොට තබන්නට යෑමෙන් ය අප වැළකිය යුත්තේ. මේ කාන්තාවන් ඉල්ලා සිටින්නේ එම නිදහස නොවෙ ද?

ඒ වගේම තමා කාන්තාවක් පුරුෂකරණයට පත්වනවා යැයි ස්ත්‍රීවාදය පෙන්වා දෙනවා. එහෙම වෙන එකට එයා අකමැති ලු. ඉතින් පොඩ්ඩක් හිතන්න කාන්තාවක් ඒ තත්ත්වයට පත්වෙන්නේ පුරුෂයන්ගේම ක්‍රියාවන් නිසා නේද කියලා.

ඉතින් සාම්ප්‍රදායික ගැහැනියගෙන් මිදී නව ලොව කාන්තාවක් ලෙසට කාන්තාව ලෝක ය දකින එක මට නම් වරදක් නොවේ.

මාතලන් සොයුරාත් ලස්සන කියමනක් දාලා තිබුණා. මෙන්න ඒක 

//සම්ප්‍රදාය කරේ තියාගෙන නොයන කෙල්ලො කීප දෙනෙක් බ්ලොග් ළෝකෙත් ඉන්නවා. මල් කඩන දහසක් දෙනා අතරේ.//

ඉතින් මේ කියමනේ ඇති ගැඹුර බ්ලොග් ලියන කියවන අපේ සොයුරියන් තේරුම් ගනීවි කියලත් හිතනවා. ඒ වගේම නිතර නොදකිනවා නම් අරුණි ශපීරෝ නම් ශ්‍රී ලංකික කාන්තාව ලියන බ්ලොග පැත්තටත් ගොඩවැදිලා බලන්න කියලා මං අපේ සොයුරියන්ගෙන් ඉල්ලා සිටිනවා. අප අතර මාත වාද තිබෙන්නට හැකියි. ඒවා ගැන විවාද කරමු. මල් මල් ලොක්යෙන් ඉඳ හිට හෝ දවසක එළියට ඇවිත් වෙනස් විදියකට ලෝකය දකින්න වෙර දරමු.

වෙනස් විදියට ලෝකය දකින කාන්තාවන් අද දවසේ අගයමු.