බින් ලාඩන් මැරූ හැටි අමෙරිකා සීල් භටයා කියයි

බින් ලාඩන් බිරියගේ දෙවුරෙන් අල්ලා තල්ලු කළා

රට වෙනුවෙන් වැඩ කළ මට අද යන එනමං නෑ

හිටපු අල්කයිඩා නායක ඔසාමා බින් ලාඩන් ඝාතනය කළ අමෙරිකා නාවික හමුදා සීල් භටයා පෙරේදා සිය නිහඬතාව බිඳිමින් එම ඝාතනය සිදු කළ අයුරු අනාවරණය කර තිබේ. ඒ සමඟම දැන් විරැකියාවෙන් පෙළෙන තත්ත්වය යටතේ තමා මූල්‍යමය වශයෙන් දුෂ්කරතාවන්ට මුහුණදී ඇති බව ද ඔහු කියා ඇත.


එස්කුවයර් සඟරාවට දුන් සම්මුඛ සාකච්ඡාවකදී මේ කොමාන්ඩෝ භටයා සිය අනන්‍යතාව රහසක් සේ තබාගෙන ඇතත් 2011 මැයි මස සිදුකෙරුණු බින් ලාඩන් ඝාතන ක්‍රියාවලියේ දී ඔහු ගේ භුමිකාව සම්බන්ධයෙන් සියලු තොරතුරු පළමු වරට අනාවරණය කර තිබේ.

මෙහිදී ඔහු සිය පවුලේ ආරක්ෂාව සම්බන්ධයෙන් පවත්නා කණස්සල්ල ද ප්‍රකාශයට පත් කර ඇත. එම අවස්ථාවේ බින්ලාඩන් වික්ෂිප්තව සිටි බවත් තමා අපේක්ෂා කළාටත් වඩා ඔහු උස් පුද්ගලයකු වු බවත් සීල් භටයා කීවේය.

පාකිස්තානයේ අබොටබාද් හි ලාඩන් සැඟවි සිටි නිවසේ තෙවැනි මහල වෙත අඳුරේම කොමාන්ඩෝ භටයන් ළඟාවීමත් සමඟ බින්ලාඩන් සිය බාලම බිරියගේ දෙඋරෙන් අල්ලා ඇය ඉදිරියට තල්ලු කළ බවත් ඔවුන් අසල ඒ. කේ. 47 රයිෆලයක් තිබුණු බවත් භ‍ටයා කීවේය.

"ඇය වෙඩි නොවදින කබායක් පැළඳ සිටියා ද යන්න හෝ දෙදෙනාම දිවි පිදීමේ අදහසින් ඇය තල්ලු කළා ද යන්න ‍හෝ මා දන්නේ නැහැ. එහෙත් ඔහු‍ගේ අතේ දුරින් ගිනි අවියක් තිබුණා. ඔහු අපට තර්ජනයක් බව මා දැන සිටියා.

ඔහුට පුපුරුවා ගැනීමක් පවා සිදු කරගන්නට ඉඩක් නොතබා ඔහුගේ හිසට වෙඩි තබන්න මට අවශ්‍ය වුණා. ඒ මොහොතේ ම ඔහුගේ නළලට මා‍ දෙවරක් වෙඩි තැබුවා. දෙවන වර මා වෙඩි තැබු‍වේ ඔහු බිමට පතිත වීමත් සමගයි.

ඔහු තමාගේ යහන අසල බිම වැටුණා. එවිට මා යළිත් ඔහු‍ට වෙඩි තැබුවා. ඒත් නළලටමයි. ඔහු මැරී සිටියා . සෙලවුණේවත් නැහැ . ඔහුගේ දිව එළියට ඇදී තිබුණා"යැයි භටයා කියා තිබේ. මේ විස්තරය ප්‍රකාශයට පත්කරන එස්කුවයර් සඟරාව නිර්නාමික සෙබළා, ප්‍රහාරකයා ලෙස හඳුන්වා ඇති අතර ඔහු විශ්‍රාම වැටුපක් ,සෞඛ්‍ය රක්ෂණයක් හෝ පවුලේ අයට අතිරේක ආරක්ෂාවක් නැති නිර්නාමික වීරයකු බවටපත්ව ඇතැයි පවසා තිබේ.

කෙසේවෙතත් මේ අනාවරණයන් සිදුව ඇත්තේ මීට කලින් බින්ලාඩන් වැටලීමට සම්බන්ධ වූ මැ‍ට් බිසොනෙට් නම් සීල් භටයා විසින් ඒ සම්බන්ධයෙන් පොතක් ප්‍රකාශයට පත්කිරීමෙන් පසුවය.

අමෙරිකාවේ විශ්‍රාම ගිය සෙබළුන් හෝ බුද්ධි අංශ නිලධාරින් හෝ ඔවුන්ගේ අත්දැකිම් ගැන ප්‍රකාශ නිකුත් කිරීමට කලින් සංවේදනීය තොරතුරු අනාවරණය වීම වැළැක්වීම සඳහා අදාළ අත් පිටපත් පෙන්ටගනයේ විමර්ශනයට ලක්කළ යුතු නමුත් එස්කුවයර් අනාවරණ එසේ ඉදිරිපත් කර නැති බව සඳහන්ය.

මේ නිසා අමෙරිකා ආරක්ෂක දෙපාර්තමේන්තුව සඟරා ලිපියෙන් නොකිවයුතු රහස් අනාවරණය වී ඇත්ද යන්න සොයා බලන බව පවසා තිබේ. එස්කුවයර් අනාවරණයට අනුව බින්ලාඩන් මෙහෙයුමට ගතව ඇත්තේ විනාඩි 15ක කාලයක් පමණි.

එහෙත් ප්‍රහාරකයන් රැගෙන ගිය හෙලිකොප්ටරයක් එහි කඩා වැටුණ අවස්ථාවේ සියල්ල අවසන් බවත් ඔවුන්ට ගොඩ යාමක් නැති බවත් සිතුණා යැයි භටයා කියා තිබේ. මෙහිදී සොරා ගන්නා මෝටරියකින් ඉස්ලාමාබාදයට පලායාම හා පාකිස්තාන හමුදාව පැමිණෙන තෙක් රැඳී සිටින්නට සිදුවෙතැයි සිතූ බව ද ‍ඔහු පවසා තිබේ.

කෙසේවෙතත් මෙහෙයුමෙන් පසු ජාලාල් බාද් කඳවුරකදී සී .අයි. ඒ. කාන්තා නිලධාරිනියක හමුවට තමා පමුණුවන ලද අවස්ථාවේ බින්ලාඩන් ගේ මළ සිරුර පෙන්වා මේ ඔබේ සගයා නොවේදැයි ප්‍රශ්න කළ අවස්ථාවේ ඇය හඬා වැ‍ටුණු බව ඔහු කීවේය.

එම අවස්ථාවේ තම උණ්ඩ කොපුවේ ඉතිරිව තිබුණු උණ්‍ඩ 27 සමඟ එම කොපුව සිහිවටනයක් ලෙස තබාගන්නට යැයි ඇයට දුන් බවත් ඇය බින්ලාඩන් ගේ දූතයකු ගැන විමසිල්ලෙන් පසුවෙමින් ඔහු සිටින තැන සොයා ගැනීමට සහාය වු සි.අයි.ඒ. නිලධාරිනියක බවත් භටයා පවසා ඇත.

තවද මෙහෙයුමට යන හෙලිකොප්ටර් ගමනේදී තමන්ට සුළුදිය පහ කිරීමේ තද අවශ්‍යතාවක් දැනී බෝතලයකට සුළුදිය පහ කළ බවත් එම බෝතලය බින්ලාඩන් ඝාතනය කළ අවස්ථාව වන විටත් සිය ගමන් මල්ලේ පැවැති බවත් ‍ඔහු සිහිපත් කර තිබේ.

කෙසේවෙතත් 2012 ග්‍රීෂ්ම ඍතුවේ විශ්‍රාම ගත් තැන් පටන් ඔහුගේ පවු‍ලේ අයට පළිගැනීමේ අවදානමකට මුහුණ දීමට සිදුව ඇති බවත් 16 වසරක සේවයෙන් පසු විශ්‍රාම ගත් නිසා විශ්‍රාම වැටුපක් පවා අහිමි බවත් පවසන ඔහු රට වෙනුවෙන් ඉමහත් සේවයක් ඉටු කළත් දැන් තමා 'රොඩ්ඩක් ' බවට පත්ව ඇති බවත් ‍ඔහු පවසා තිබේ.

වොෂින්ටන් -ඒ.එ‍‍ෆ්.පි

මෙම ලිපිය අද දිනමිණ පුවත් පතෙන් ද කියවිය හැකිය.