හොරණෑව! කඩේ යනව ද?

චාරිකා සටහන් හා පොත් විචාර ලියමින් මා ආරම්භ කළ සමකය වටේ අඩවියට පසු කාලීනව තවත් විශේෂාංග ද එක්කළෙමි. ඉත් අනතුරුව විවිධ විචාරයන් ද මා අරබයා ඇති වන හැටි දුටුවෙමි. විටෙක මා කඩේ යන්නෙකු ලෙසද හැඳින් විණි. ඒ මා දිනමිණ සාමාජිකයෙකු බව හෙළි කරමින් සෘජුවම නියම නමින් පෙනී සිටි නිසාවෙනි. ඉතින් එහෙමනම් මෙන්න අපේ කඩේ යාම ගැන බිඳක්.මොන විවේචන තිබුණද ඔබ හා බැඳි ලෙංගතු කමට එම විවේචන බාධකයක් නොවේ...විවේචනය මට ශක්තියකි....

ආණ්ඩුවේ හොරණෑව යැයි නමක් අපට පටබැඳී තිබේ. ආණ්ඩුවට කඩේ යනවා යැයි විවේචනයක් ද අප වෙත එල්ල වී තිබේ. නම් පටබැඳීම ගැන හෝ විවේචන එල්ලකිරීම ගැන හෝ විරෝධයක් අප තුළ නැත. සිතිවිලි හා සිහින බැඳ දැමිය නො හැකි ය. ඒවාට සීමා - මායිම් නැත. හේතු ප්‍රත්‍යය ද නැත. මිනිසාගේ ආකල්ප හා මතිමතාන්තර ද එසේම ය. ඒවාට නිදහසේ ගලායෑමට ඉඩතැබීම යුතුකම ය. අවශ්‍ය තැන දී පමණක් හැරවුම් ලක්ෂයක් ඇති කිරීමට අපි ප්‍රයත්න දරමු. කුමක් වුව ජනතාව වෙනුවෙන් පෙනී සිටීම අපගේ අරමුණ ය. ඔවුන් වෙනුවෙන් කඩේ යා හැකි නම්; කිසිදු ඇඹරීමකින් තොර ව අපි එම කාර්යය ඉටු කරන්නෙමු.

රජය හා ආණ්ඩුව යනු වචන දෙකකි. සංකල්ප දෙකකි. අර්ථ දෙකකි. එහෙත් ජනතාව මේ වචන දෙක ම භාවිත කරනුයේ එක ම තේරුමක් සඳහා ය. අද දවසේ පාලන තන්ත්‍රය හැඳින්වීම සඳහා ඔව්හු එම වචන දෙක ම භාවිත කරති. එය වෙනස් කළ නො හැකි ය. කුමක් වුව රජය යනු ද ජනතාව ය. ආණ්ඩුව යනු ද ජනතාව ය. දේශපාලන අර්ථයකින් විග්‍රහ කරන විට ආණ්ඩුවක් පත් කරනුයේ ජනතාව ය. එනම්; ජනතාවගේ පරම බලය වූ ඡන්ද අයිතියෙන් ආණ්ඩුවක් පත් කෙරේ. එසේ නම්; බහුතර ජනතාවකගේ ජන මනස වෙනුවෙන් පෙනී සිටීම වරදක් ද? ඔවුන් සඳහා කඩේ යෑම වරදක් ද?

ලෝකයේ විධිමත් පුවත්පත් කලාව ආරම්භ වී වසර 400කට වඩා ගෙවී ගොස් නැත. එදා සිට අද දක්වා සෑම පුවත්පතකටම න්‍යාය පත්‍රයක් තිබේ. ඉලක්කයක් තිබේ. සේවාවක් තිබේ. අපගේ න්‍යාය පත්‍රය සැකසී ඇත්තේ ජනතාව වෙනුවෙන් ය. ඒ අනුව ජනතාව පත් කළ ආණ්ඩුවක් ආරක්ෂා කිරීම අපගේ ප්‍රතිපත්තිය වේ. ඒ වෙනුවෙන් කටයුතු කිරීමේ කිසිදු වරදක් ද අපට නො පෙනේ. එහෙත් රජයේ ඇතැම් ආයතන විවේචනය කළ යුතු තැන දී අපි එය නො වලහා ඉටු කරන්නෙමු. එහෙත් එම විවේචනය සද්භාවයකින් යුතුව කරන්නට අපි වග බලා ගනිමු. එය අපගේ ශෛලිය හා මෝස්තරය වේ.

මේ යුගය වනා හී ලෝකයේ සියලු පුවත්පත් ආයතන අභියෝගයට ලක් වී ඇති කාලයෙකි. මේ වන විට ප්‍රවෘත්ති දැන ගැනීම සඳහා පුවත්පත් මිලට ගැනීම අවසන් වෙමින් පවතී. වඩාත් වේගවත් හා සජීවී ප්‍රවෘත්තිකරණයක් විද්්‍යුත් ජනමාධ්‍යයට පවතී. විද්යුත් ජනමාධ්‍ය විසින් මුද්‍රිත ජනමාධ්‍යය ආක්‍රමණය කර තිබේ. ඒ අනුව නව උපාය මාර්ග ඔස්සේ පුවත්පත් ජනප්‍රිය කරවීමට අපට සිදු වී තිබේ. එම උපාය මාර්ග මොනවාදැ’යි පැහැදිලි නොකරන නමුදු අප පරාජය වී නැති බව පමණක් කියන්නට කැමැත්තෙමු. ගිය වසරේ අපගේ ආදායම රුපියල් ලක්ෂ තිස්හත්දහසකි. එය මෙරට ජනමාධ්‍යය ආයතනයක් ගිය වසරේ ලැබූ ඉහළම ආදායම බව ද කියන්නට කැමැත්තෙමු.

සීමාසහිත එක්සත් ප්‍රවෘත්ති පත්‍ර සමාගම හෙවත් “ලේක්හවුස්” ආයතනය මෙරට පවත්නා පැරැණිම හා විධිමත් ම මුද්‍රිත ජනමාධ්‍ය ආයතනය වේ. අග්නිදිග ආසියාවේ පවත්නා ඓතිහාසික ජනමාධ්‍ය ආයතනයක් ලෙස ද එය ගෞරවයට පාත්‍ර වේ. කලින් කලට විවිධ පුවත්පත් සමාගම් බිහි වන අතර ඒවා සමඟ තරගයක යෙදෙන්නට ද අපට සිදු වී තිබේ. එම තරගයට ද මුහුණ දෙමින් විවිධ පාලන තන්ත්‍ර යටතේ ක්‍රියාත්මක වීමට ද අපට සිදු වේ. එය එක් අතකින් අභියෝගයකි. විශාල ම අභියෝගය වන්නේ ආයතනයක් මුල්‍යම ය වශයෙන් අසාර්ථක නො වී පවත්වාගෙන යෑම ය. එම අභියෝගය අප විසින් සාර්ථක ව ජයග්‍රහණය කර තිබේ. ලබන වසරේ අපගේ ඉලක්කය රුපියල් ලක්ෂ හතළිස් දහසක ආදායමකි.

බොහෝ ආයතන ලාභ ලබන’මුත් සේවකයාට නිසි ලෙස සලකන්නේ නැත. සේවකයාගේ ශ්‍රමයට නියමිත වැටුපක් ගෙවන්නේ ද නැත. නොයෙක් ආයතනවල අඩු පඩියට, අඩු පහසුකම් යටතේ වැඩ කරන සේවකයන්ගේ අෙඳීනාව අපි අසා ඇත්තෙමු. ඒ අතින් ලේක්හවුස් ආයතනය බොහෝ වෙනස් ය. එහි ප්‍රධාන සම්පත වැඩ කරන සේවකයා ය. මෙතරම් ප්‍රසාද දීමනා දෙන ආයතනයක් ශ්‍රී ලංකාවේ කිසිදු තැනෙක නැත. මෙතරම් පහසුකම් ඇති ආයතනයක් ද මෙතරම් නිදහසක් ඇති ආයතනයක් ද ශශ්‍රී ලංකාවේ කිසිදු තැනෙක නැත. මේ වසරේ සිට සියලු ම සේවකයන්ගේ මාසික වැටුප රුපියල් දහසකින් වැඩි කිරීමට ද ආයතනය තීන්දු කර තිබේ.

ආයතනයක සාර්ථක හෝ අසාර්ථක හෝ තත්ත්වයෙන් අඩකට පමණ ම වගකිව යුත්තේ එහි පාලකයා ය. හෙවත් ආයතන ප්‍රධානියා ය. ලේක්හවුස් ආයතනයේ පාලකයා එහි සභාපතිවරයා හා කළමනාකාර අධ්‍යක්ෂවරයා ය. වත්මන් සභාපතිවරයා හා කළමනාකාර අධ්‍යක්ෂවරයා බන්දුල පද්මකුමාර මහතා ය. ඔහු මුළු රටම හඳුනන ප්‍රවීණ මාධ්‍යවේදියෙකි. බන්දුල පද්මකුමාර මහතා ලේක්හවුස් ආයතනය භාර ගත්තේ මීට වසර පහකට පෙරාතුව ය. ඒ වන විට ආයතනයේ මුල්‍ය ශක්තිය යම් පමණකින් පිරිහී තිබිණි. මේ වන විට එම අංශ දෙක ම යථාවත් කිරීමට සභාපතිවරයාට හැකි වී තිබේ. එය විශාල ජයග්‍රහණයක් ලෙස සටහන් කර තබමු.

ආණ්ඩුවේ හොරණෑව යැයි විවේචනයක් තිබුණ ද රාජ්‍ය භාණ්ඩාගාරය මේ ආයතනය සඳහා මුදල් වෙන් කරන්නේ නැත. එබඳු අපේක්ෂාවක් ද මෙහි පාලනා’ධිකාරිය තුළ නැත. ලේක්හවුසිය වනා හී ස්වාධීන ආයතනයකි. එය මුදල් උයමින් ලාභ ලබන ආයතනයක් ලෙස බරපතළ ජනතා සේවයක් ද ඉටු කරයි. රටේ පොදු මහත් ජනතාවගේ අධ්‍යාපනය, දැනුම හා රසාස්වාදය ඉහළ මට්ටමකට රැගෙන යෑම මේ ආයතනයේ එක් ඉලක්කයකි. ඒ සඳහා නූතන තාක්ෂණය ද, පරිකල්පනය ද උපරිමයෙන් යෙදැවීම අපගේ ප්‍රතිපත්තිය වේ. එහි අති සාර්ථක කඩඉමකට අපි දැන් පැමිණ සිටිමු. මේ ජයග්‍රහණය අපගේ ජයග්‍රහණයකටත් වඩා ජනතාවගේ ජයග්‍රහණයක් ලෙස සලකන්නට කැමැත්තෙමු.

අප ආයතනය වඩාත් වැදගත් යැයි සලකන සම්පත් දෙකක් තිබේ. පළමු සම්පත නම් ; අපගේ පාඨක ප්‍රජාව ය. ඔවුන් නො වන්නට මේ කිසිදු ජයක් අප වෙත ළඟා නො වේ. දෙවන සම්පත නම් ; අපගේ සේවක ප්‍රජාව ය. ආයතනය ලබන ජයග්‍රහණ යනු සේවක ප්‍රජාවගේ දහදිය මහන්සියේ ප්‍රතිඵල ය. මේ සම්පත් දෙක ද ආරක්ෂා කරමින් දුර ගමනක් යෑම අපගේ ඉලක්කය යි. එබැවින් කඩේ යෑමට බයක් අප ළඟ නැත. මන් ද? අප කඩේ යන්නේ ජනතාව සඳහා බැවිනි.

මේ අද දින දිනමිණ කතුවැකියයි.