මුහුදු පතුලේ මිනිත්තු 30ක්

අද අප සංචාරයේ දෙවැනි දිනයයි. අපගේ සංචාරක කාල සටහනට අනුව අප අද යා යුතුව ඇත්තේ පතායා වෙරළේ සිට මුහුදු සැතපුම් 7ක් පමණ දුරින් පිහිටි මුහුද යට කොරල් දූපත නැරැඹීමටයි.

තායිලන්තය සාමාන්‍යයෙන් වසර පුරා උෂ්ණ කාලගුණයකින් යුක්තය. දකුණු ප්‍රදේශවල සාමාන්‍යයෙන් ඍතු 2ක් තිබීම හැරුණුවිට තායිලන්තයේ සාමාන්‍යයෙන් ඍතු 3ක් ඇත.

Cool Season (ශීත ඍතුව-නොවැම්බර් සිට පෙබරවාරි දක්වා) Hot Season (උෂ්ණ ඍතුව මාර්තු සිට මැයි දක්වා) Rain Season (වර්ෂා ඍතුව - ජුනි සිට ඔක්තෝම්බර් දක්වා) තායිලන්තයේ උෂ්ණත්ව ප්‍රදේශ වනුයේ මධ්‍යම සහ වයඹ ප්‍රදේශයි.

මෙම ප්‍රදේශවල උෂ්ණත්වය සෙන්ටිග්‍රේඩ් අංශක 40 දක්වා ඉහළ නගී. ශීත කාලයේ දී වුවද උෂ්ණත්වය සෙන්ටිග්‍රේඩ් අංශක 20 දක්වා අඩු වන්නේ කලා තුරකිනි.

ජුනි සිට ඔක්තෝම්බර් දක්වා කාලය වර්ෂා ඍතුව වුවද අප සංචාරය ජූලි මසට යෙදී තිබුණත් තායිලන්තයට වර්ෂාවක් නොමැත. මන්ද පෘථිවිය තුළ අද වනවිට පවතින කාලගුණික අසමතුලිතතාව මීට හේතුවයි.

තද හිරු රැසින් බර පතායා වෙරළ තීරය තවතවත් උණුසුම් වන්නේ හිරු කිරණ මුහුදේ ජල මතුපිටට පතිත වී පරාවර්තනය වන බැවිනි. එයින් එහි වායුගෝලය තවතවත් උණුසුම් වෙයි. අර්ද්‍රතාව ශුන්‍ය වී ඇත.

 දහදිය බිදු මුළු සිරුර පුරා දෝරේ ගලයි. කොපමණ පීඩාවට පත්වී සිටියත් අපගේ සංචාරක ගමන් ඇරැඹුම දැන් ළඟා වී හමාරය. ජීවිතාරක්ෂක අධිවේගි මෝටර් බෝට්ටුවකට නැඟි මමත්,
 නලිනුත් කෝලැන් (Koh Larn) කොරල් දූපත දක්වා ගමන් ඇරැඹුවෙමු.

කෝලැන් හෝ කෝලැන් ලෙස ව්‍යවහාර වන එහි අර්ථය ‘කොරල් දූපත’ යන්නයි. මෙය පිහිටා ඇත්තේ බටහිර පතායා සිට කිලෝමීටර් 12 ක් පමණ දුරින් වන අතර අධිවේගි බෝට්ටුවකින් විනාඩි 30 කින් යා හැකි ය.

මෙ ගමනේ දී මුහුද රළුනම් යමෙකුට කරකැවිල්ල හෝ වමනයද ඇතිවීමට ඉඩ ඇත. නමුත් මුහුදු ගමනේදී දිය බිඳී ඉදිරියෙන් හා පසුපසින් විහිදෙන්නේ ගතට සිසිලසක් දනවමිනි.

පතායාහි කළබලකාරි වෙරළට වඩා කොරල් දූපත් සන්සුන් ය. එසේ හෙයින්ම ඒවා ‘සන්සුන් දිවයින්’ (Island of Tranquility) ලෙස හැඳින්වේ. එහි වෙරළ සුන්දරය. මුහුදු ජලය වීදුරුවක් මෙන් පැහැදිලිය.

පුළුල් වැලි තලාවකින් යුත් වෙරළකින් සමන්විත කෝලෑන් දූපතේදී දිය යට කිමිදීම හා මුහුදු පතුලේ ඇවිද යෑම වැනි ආශ්චර්යමත් ක්‍රියාවන් වල නිරත විය හැකිය.

මෙහිදී වීදුරුමය පත්ලක් ඇති බෝට්ටුවක නැගී කොරල් වල සුන්දරත්වය අත්විඳිය හැකි සේම කිමිදුම් කට්ටලයක් පැළඳ දිය යට කිමිදී, දිය යට ඇවිදිමින් සුන්දර මසුන් සහ කොරල් නැරැඹිය හැකිය.

මුහුදු පතුලේ ඇවිදීම අමුතුම අත්දැකීමකි. මෙහිදී බෝට්ටුවේ එල්ලෙන කඹයකින් ඉනිමඟක ආධාරය ඇතිව කිමිදුම්කරුවකුගේ මාර්ගෝපදේශයෙන් මුහුදු පතුලට යා හැකිය.

මේ සඳහා වීදුරු ගෝලයක් හැඩැති හෙල්මටයක් සම්පූර්ණ මුහුණම ආවරණය වන පරිදි උර මත රඳවනු ලැබේ. මේ සඳහා වන ස්වසන උපකරණ සියල්ල බෝට්ටුව හා සම්බන්ධව පවතී.

පුද්ගලයන් 6 - 8 දෙනකුගේ කණ්ඩායමක් සමඟ එක් කිමිදුම්කරුවකු යෙදවෙන අතර ඔහු සියල්ලන්ටම අවට සිරි දක්වනු ලැබේ. එහි ලොකු කුඩා මසුන් බහුලය. මෙහිදී අප අත රඳවනු ලබන ආහාරවලට මසුන් කටගසන අයුරු අපට අත්විඳිය හැකිය.

සමහරවිට මසුන් අතපය කෑමටද හැකිවන්නේ ය. තවද මසුන් දහස් ගණනින් මුළු ශරීරය පුරාම වැතිරී ස්පර්ශ වීම අප ලබන මහත් ආශ්චර්ය ජනකම අත්දැකීම ය. මේ අභ්‍යන්තර මුහුදු අත්දැකීම විඳගන්නට ලැබෙන්නේ විනාඩි 30 - 45 ත් අතර කාලයක් පමණි. මේ සඳහා එක් අයකුගෙන් බාත් 1200ක් අය කරයි. මුහුදු පතුලේ අපට අත්විඳීමට සිදුවන ඒ වූ සුන්දර අත්දැකීම ඡායාරූප ගතකළ CD තැටියක් ඔබට ලබා ගැනීමට හැකිවන අතර ඒ සඳහා බාත් 700ක අමතර ගෙවීමක්ද කළ යුතුය.

මුහුදු පතුලේ කොරල්පර නරඹන කණ්ඩායමක්

මත්ස්‍යයන් ස්පර්ශ කරමින්...

ස්තූතිය :- Hemas Travel (Pvt) Ltd හි මදුෂ වරුසවිතාන මහතාට
http://www.myprimetrip.com/

ආසිරි සමඟ නලින්

තායිලන්ත සංචාරයකින් පසු




විශේෂ ස්තුතිය

http://www.nippolacpaints.com/products/locator.php

හි මිහිරාන් ඕපාත මිතුරාට