පතායා හි අඩි 240ක් උසක සිට බිම බැලුවෙමි...

පතායා වෙරළ ආශ්‍රිත ක්‍රියාකාරකම් සහ ඈත දියඹේ සුන්දරත්ව විඳී අප සයුමි දූපතේ (Samui Island) සංචාරක නිවාඩු නිකේතනයෙන් නික්ම සංචාරක මඟ පෙන්වන්නා ද සමඟ යළි පතායා නගරයට පැමිණ පතායා හි සුවිසල් පාර්ක් ටවර් (Parktower) කුලුන නැරැඹීමට ගියෙමු.

පාර්ක් ටවර් (Parktower) පිහිටියේ තායිලන්තයේ නැගෙනහිර වෙරළේ පිහිටි පතායා උද්‍යාන වෙරළ නිකේතනයේ ය. සංචාරකයකු ජීවිතයේ කිසිදා අත් නොවිඳී ප්‍රමෝදයක් මෙහිදී අත් විඳීය හැකිය. මෙහිදී ස්කයි ෂටලය (Sky shuttle) ස්පීඩ් ෂටලය (Speet shuttle) හා කුලුනු පැනුම (Tower jump) යන අංගයන්හි ත්‍රාසජනක අත්දැකීම විඳ ගැනීමට හැකියාව ලැබේ. උස් කුලුනේ සිට අවට සිරි නැරැඹීමම චකිතය මුසු ප්‍රමෝදයක් ඇති කරවන්නෙකි.




මීටර් 240 ක් උස කුලුනේ  මීටර් 170 ක උසක සිට වෙරළ තීරය දක්වා පහළට පැනීම හෝ ස්කයි ෂටලයෙන් (Sky shuttle) කණ්ඩායම් වශයෙන් ගමන් කිරීම වැනි ක්‍රියාකාරකම් වල යෙදිය හැකිය. තවද මෙහිදී ස්පීඩ් ෂටලය (Speet shuttle) මඟින් ගමන් කිරීමෙන් සංචාරකයන් ගමන් ගන්නා වේගය දෙගුණ තෙගුණ කරගත හැකි ය. මේ සියල්ලම නිරීක්‍ෂණ ප්‍රවේශ පත්‍රයක් මිලදී ගත්විට නොමිලයේම අත්විඳීය හැකි ය.

කුලුනේ මුදුනේ සිට දක්නට ලැබෙන දර්ශනය කිසිදා අමතක නොවන අත් දැකීමක් වන අතර එහි 52, 53 සහ 54 වැනි මහල්වල පවත්නා මෙරිඩියන් රිවොල්වින් රෙස්ටොරන්ට් (Meridian Revoluing Restaurant) නම් කැරකෙන ආපන ශාලාවේ ආහාර භුක්ති විඳිය හැකි ය. මෙහිදී රසවත් ඉස්සන්, පොකිරිස්සන්, කකුළුවන්, දැල්ලන් වැනි කෑමද මුහුදු ශාක ද බත්, නූල්ඩ්ස් වැනි ආහාර ද රස විඳිමින් පසු තලවල ඇති දර්ශනීය පරිසරයට ද නෙත යොමුකරමින් වඩාත් ආශ්චර්යමත් අත්දැකීමක් විඳ ගැනීමට හැකිවන්නේ ය. වෙරළ තීරය මෙන්ම පතායා නගරය ද මෙහිදී මුළුමනින්ම දර්ශනයට හසුකර ගැනීමට හැකි ය.

පතායා උද්‍යානයේ පවතින ජල උද්‍යානය ද මෙහි එන තවත් එක් විනෝදාංගයකි. වෙරළාසන්න ජල උද්‍යානයේ දී යෝධ ජලාශ්‍රිත ලිස්සනයන් හි ලිස්සෙමින් (Water slides) එහිදී නැඟෙන දිය බිදුමේ අසිරිය විදීමට මෙන්ම දිය සුළි මැද ගැලී සිටීමට ද හැකි වන්නේ ය. ජල උද්‍යානයේ දී මුහුදු ජලයේ ගිලී සිටීමට අමතරව වෙරළේ වැතිර අව් රශ්මිය විඳ ගැනීමට ද සංචාරකයන්ට අවස්ථාව උදාවේ.

තවද මේ විනෝද උද්‍යානයේ ත්‍රාසජනක අංග රාශියක ත්‍රාසජනක අත්දැකීම විඳ ගැනීමට සංචාරකයන්ට පහසුකම් සලසා ඇත. ඒ අතර පැද්දෙන වයිකිං නෞකාව, ස්ලාලොම් රෝලර් කෝස්ටරය (Slalon Roller Coaster) සංගීතමය මැරිගොරවුම හා කණ්ඩායම් වශයෙන් පැදිය හැකි ඔංචිල්ලාව ද මොනෝරේල් (Monorail) නම්  තනතිල්ලේ දුවන දුම්රියෙන් උද්‍යාන නිකේතනය වටා ගමන් කිරීම ද ආශ්වාද ජනක අත්දැකීමකි. පතායා නගරයේ අවට සිරි නරඹා අවසන මමත් නලිනුත් මීටර් 240 උස කුලුනු බදේ පිහිටි විදුලි සෝපානයට නැඟ වේගයෙන් බිම පතිතවූයේ අපගේ ගැ‍හෙන හදවත අතට ගෙනය.

මෙහිදී අපට සිහියට නැගුනේ තායිලන්තය හා සසඳා බලද්දී සංචාරක කර්මාන්තය අතින් අපරට අහසට පොළොව වැනි බවය. මන්ද අපේ රටේ සංචාරක කර්මාන්තය සාම්ප්‍රධායික මෙන්ම යල් පැන ගිය අඩු ආදායම් ලබන තත්ත්වයට පත්ව ඇත්තේ රටට පැමිණෙන සංචාරකයින්ට අත්විඳීය හැකි මෙවැනි ක්‍රියාකාරකම් සංචාරක පුරවර වලට ඇතුළත් නොවීම නිසා බව තේරුම් ගැනීමට පතායා වැනි නගර කදිම නිදසුන් ය. ශ්‍රී ලංකාවේ ස්වභාවික සෞන්දර්ය නොවන්නට සංචාරකයින් මෙහි පැමිණෙන්නේ නම් ඊට හේතු වන්නේ ඔවුන්ගේ රටවල් හා සසඳා බලන විට ජීවන වියදම අඩුකම නිසා මිස වෙනත් හේතුවක් නිසා නම් නොවෙද?

ස්තූතිය :- Hemas Travel (Pvt) Ltd හි
මදුෂ වරුසවිතාන මහතාට
http://www.myprimetrip.com/

සහ
මිහිරාන් ඕපාත මිතුරාට

සටහන
නලින් දිල්රුක්‍ෂ  සමඟ ආසිරි මල්ලව ආරච්චි
තායිලන්ත සංචාරයෙන් පසු....


විශේෂ ස්තුතිය






http://www.nippolacpaints.com/products/locator.php