"Dance in a Trance – 2014", ඒකපුද්ගල ඡායාරූප ප්‍රදර්ශනය මාකොල උදේශී සිටි ක්ම්පෙල්ක්ස්හි දී

ප්‍රවීණ ඡායාරූප ශිල්පී හෙන්රි රාජකරුණා මහතා විසින් අට වන වරට පවත්වනු ලබන ඒක පුද්ගල ඡායාරූප ප්‍රදර්ශනයක් මෙම මස 10 සිට 12 දක්වා මාකොල උදේශී සිටි ක්ම්පෙල්ක්ස්හි දී පැවැත්වේ. ,"Dance in a Trance – 2014", යනුවෙන් නම් කර ඇති මෙම ප්‍රදර්ශනය නොමිලේ පවත්වනු ලැබේ.

චලනය පෙන්වීම අඩු කාචද්වාර වේගයකින් ගන්නා ලද පිංතූර (Slow shutter speed photography) මේ සඳහා තෝරා ගෙන තිබීම මෙම ප්‍රදර්ශනයේ ඇති විශේෂත්වයකි. මෙහිදී නර්තනයේ ඇති ලාලිත්‍ය බව ඡායාරූප ඇසුරෙන් පෙන්වීමට රාජකරුණා මහතා උත්සාහ දරා ඇත.
හෙන්රි රාජකරුණා මහතා අන්තර්ජාතික මට්ටමෙන් පවත්වන ලද ඡායාරූප ප්‍රදර්ශනවලදී ත්‍යාග හා සම්මාන ලද ඡායාරූප සහ වේදිකා නාට්‍ය ඇසුරෙන් ලබා ගන්නා ලද ඡායාරූප මෙහිදී ප්‍රදර්ශනය කෙරේ.
රාජකරුණා මහතා අන්තර්ජාතික ඡායාරූප කලා සංගමය මගින් දක්ෂතා වෙනුවෙන් පිරිනමනු ලබන ඉහලම සම්මානය (MFAP) හිමි කරගත් ඡායාරූප ශිල්පියෙකි.
මෙම මස 10 වෙනි දින ප.ව.5.00 ට රජයේ ප්‍රවෘත්ති අධ්‍යක්ෂ ජනරාල් මහාචාර්ය ආරියරත්න ඇතුගල මහතාගේ ප්‍රධානත්වයෙන් විවෘත කෙරෙන මෙම ප්‍රදර්ශනය 11 සහ 12 යන දිනයන්හිදී මහජනතාව වෙනුවෙන් විවෘතව පවතින බව රාජකරුණා මහතා පවසයි.