අතීත වාස්තු විද්‍යාව පිළිබිඹු කරන සොල්දර ගෙවල්

හිසට සෙවණ ලබා දෙන්නේ නිවහනයි. නිවහන තමන්ගේ රුචි අරුචිකම් මත නිර්මාණය කරනු වස් බොහෝ දෙනා උත්සුක වෙති. සිය ආර්ථික තත්ත්වයටත්, සිතට සරිලන ආකාරයෙනුත් හිසට සෙවණ තැනීම කාගේත්    පරමාභිලාෂයයි. මේ එවන් ආකාරයකට තැනූ නිවෙස් ය. දකුණු ලක අපේ ඇස ගැටුණු පෞරාණික ගෘහ නිර්මාණ ශිල්පයේ ආභාෂය ලබා තැනූ නිවෙස් ය. වසර ගණනාවක ඉතිහාසයකට උරුමකම් කියන ඒවා පෘතුගීසි, ලන්දේසි ගෘහ නිර්මාණ ශිල්පයේ ආභාෂය ලැබූවකි. 

තව ද නුවර යුගයේ කැටයම් ද සහිතය. සමකාලීන ගොඩනැඟිලි නිර්මාණවල ඇති හැඩතල හා කැටයම් මෙහි දක්නට ලැබෙයි. තව ද මේවායේ මැද මිදුල සහිත ය. සොල්දර ක්‍රමය සහිතය. 
බොහෝ සිතුවිලි ඈත අතීතයකට දිව ගියේ එදා මෙහි ජීවත් වූ කුලවත්, වංශවත් හා රදල පෙළපත්වලින් පැවත එන්නන්ගේ මනා ගර්වයත්, ප්‍රභූත්වයත්, බොහෝ කතා වස්තූන්වල හා නිර්මාණයන් හි තිබූ බැවිනි. කාලයාගේ ඇවෑමෙන් මෙහි විසූ කුලවතුන්, ප්‍රභූවරුන් මිය පරලොව ගිය ද ඔවුන් මේ මේ යැයි මේ මේ ආකාරයට ජීවත් වන්නට ඇතැයි යන්න අප හට චිත්ත රූප මවන්නට මේ ගොඩනැඟිලි සමත් ය. ගනකම් බිත්ති, සාලය, පඩිපෙළ, කණු, මැද මිදුල, ගරාදි වැට, තරප්පු පෙළ හා සොල්දර ක්‍රමය අතීත වාස්තු විද්‍යාව පිළිබඳව අපට කියා පාන කැටපතයන් ය. 
මෙවැනි නිවාස කිහිපයක් තවමත් ගරා වැටෙමින්, යළි අලුත්වැඩියා කරමින්, වෙනස් කරමින් තැනෙමින් පවතී. අපේ ඇස ගැටුණු එවන් නිවෙස් කිහිපයක් මෙසේ දක්වමු.

ශ්‍යාමා සමරසිංහ

ඡායාරූප - නිශ්ශංක විජේරත්න 

මිහිතුරු සඟරාවට ලියන ලද ලිපියකි