අමා ඔබට සුබ ගමන්......

අමාගේ සුහද හමුව දා.. සේයාරුව ඉස්සුවේ තරියා සොයුරාගෙනි

"ප්‍රියේහි විප්පයෝගෝ දුක්ඛෝ"  ප්‍රියයන්ගෙන් වෙන් වීම දුකක් යන්න අදහස් කෙරෙයි. මොහොතක් සිතන්න අප දිවියේ දී මොනතරම් ප්‍රියයන් පිරිසක් අපෙන් වෙන් වී ඇති ද?.ඒ ඒ වෙන් වීමි වල දී වෙන් වීමේ ස්වභාවය අනුවද දැනෙන දුක උස් මිටි වෙයි යන්න මගේ හැගිමයි.
මේ කෙටි සටහන ලියැවෙන්නේ ද ඉතාමත් කෙටි කාලයක ට පමණක් හමු වූ ඒත් එම පැය කීපය තුළ හොඳ හිත ලෙංගතුකම මැනවින් දැක් වූ සහෘදිනියක් වෙනුවෙනි.

ඇය අමා.... මුල්ම වරට ඇය මට හමුවන්නේ මුහුණු පොතේ සැරි සරද්දී ය. ඒ හමුවට ද මාසයක තරම් වත් කාලයක් ගොස් නැත. ඒ මුල්ම හදුනාගැන්මෙන් පසුව වුව අප දෙදෙන අතර පේලි කිපයක චැටක් මිස ඉන් ඔබ්බට ගිය පයුරු පාසානමක් ද නොවී ය. එහෙත් එම පුංචි කතා බහ වුව නිම වන්නේ දැඩි සහෝදරත්වයක් හදවත් තුළ ඇති කරමිනි. 

ඇය කොහේ සිට මා අමතන්නේ දැයි මුලින් මා දැන සිටියේ ද නැත. මා සිතා සිටියේ ඇය නුවර පැත්තේ සිට මුහුණු පොතට ගොඩ වදිනා බවකි. ඇය මට අඟවා තිබුණේ ද එවන් චිත්‍රයකි. 

පසුගිය පෙබරවාරි 20 වැනි දා හදිසියේම ඇය මුහුණු පොතෙන්   මා ඇමතුවා ය. අයියේ මම ඉන්නේ විදෙස් ගතව. මේ 27 ලංකාවට එනවා. 28 වැනි දින මා මගේ මුහුණු පොතේ යාලුවන් ටික හමුවෙන්න හිතාගන ඉන්නවා. එදාට ඔබත් නොවැරදීම එන්න.

මෙය මට තරමක ප්‍රහේළිකාවකි. මේ ලණුවක් වත් ද?. 
තව කවුද එන්නේ එදා ට.. මගෙන් පැණයක්...
මා දන්නා මිතුරන් 4දෙනකුගෙ නම් එහිදී කියැවිණි. තරමක් කුකුස නිවී ගියද මගේ පිළිතුර වුයේ උත්සාහ කරන්නම් යන්නයි.
කොහොම හරි එන්න බලන්න ඔබ එන එක මට ගොඩක් වටිනවා.. යළිත් ඇය පවසයි.

අනතුරුව මම ඉහත නම් කියැවුණු මගේ මිතුරන් අමතා සොයා බැලීමි. ඔවුන්ට ද එම පණිවුඩය ලැබී ඇත. තවත් ක්‍රම මගින් මේ සත්‍යයක්මදැයි සැක හැර දැනගතිමි.

ඒ අනුවය මා පසුගිය 28 වැනි දා ඇයගේ සුහද හමුවට එක්වන්නේ..මා එහි යන විටද දන්නා මෙන්ම නොදන්නා මිතුරන් පිරිසක්ම එහි පැමිණ තිබිණි. තැනද සුන්දර විය. එම සුන්දර සාද නිකේතනයේ හිමිකරු වුයේ ද මුහුණු පොතේ ජනප්‍රිය තරුණයෙකු වූ සජිව ජයරත්නය. 

එදින දවස ඉතාමත්ම සුන්දරව ගෙවී ගියේ අලුත් මිතුරු මිතුරියන් රැසක්ම හදුනා ගැනීමෙනි. අමා ද එදින පැමිණි සිටි සියලුම දෙනා සමග ඉතාමත් සුහදව කතා බහේ නිරත වෙමින් සතුටින් කාලය ගෙවා දැම්මා ය. එහෙත් ඇගේ දැස් යට මොදුව තිබෙන කඳුළ මම හොඳින් දුටුවෙමි. එහෙත් මේ සොඳුරු මොහොතේ ඇගෙන් ඒ ගැන විමසන්නට ද බැරිය.

අවසන අපේ සමුගැන්මේ හෝරාව එළැඹිනි. අමා බොහොම ස්තුතියි. ඔයා නිසා අලුත් යාළුවන් බොහොමයක් හදුනා ගන්න ලැබුණා. ඉතින් අපි ආයෙත් හමුවෙමු...

නෑ අයියේ මං 27 ලංකාවට ආවා (28) අද ඔයාලත් එක්ක සතුටින් හිටියා.. අනිද්දා මං ආයිමත් යනවා. මට ඉන්නේ පණ වගේ මේ යාළුවෝ ටික විතරයි..වෙව්ලන කට හඬන් ඇය පවසද්දි දෑස් කෙවෙනි තුළ දිදුළන කඳුළ සගවන්නට ඇයට නොහැකි විය.

මට ද කීමට කිසිම දෙයක් නැත. දුවණිය ඔබට සුබ ගමන්.. පසු පස නොබලා මම එතැනින් ඉවත් වීමි.

ඔබ මේ සටහන කියවන මොහොත වන විය ඇය ලංකාවෙන් පිටත්ව ගොස් තිබෙන්නට බොහෝ දුරට ඉඩ ඇත.
ඇයට සුබ ගමන් කියන්නට ද අවස්ථාවක් නොමැත..පැය කීපයකට පමණක් දුටු අමා වෙනුවෙන් මේ සටහන තැබෙන්නේ හදවතේ මොදුවන දැඩි කම්පනයක් සමගිනි. 
හරියටම මගේ සොයුරියක් වෙන්ව යනවා වැනි හැගුමකින් මසිත බර වී ඇත.

අමා සුබ ගමන්... ඔබ තබන සෑම පියවරක්ම සර්වප්‍රකාරයෙන්ම සාර්ථක වේවා.. ඔබට නොවරදිනු ඇත.. සුබ අනාගතයක්.