පතායාහි අරුම පුදුම බෝතල් කලාගාරය

පතායාහි වෙරළට ඔබ්බෙන් වු සිතිජයෙන් රත්හිරු නැඟ එයි. යාන්තම් අලුයම 6 පසුවුවා පමණි. අප නවාතැන් ගෙන සිටි පතායාහී නොහා පැල්ටිනම් හෝටලයේ (Nova platinum Hotel) පෙරදා රාත්‍රියේ පැවති මදුවිත සාදයේ රඟ කෙසේද යත් උදෑසන පිබිදුණු අපගේ ඇස් ගෙඩි දොඹ ගෙඩි සේය.

එකවර මා ආසිරිගෙන් ඇසුයේ ‘මචං අපි රෑට කෑවද?’ කියාය. මන්ද උදෑසනම වූ අසීමිත කුසගින්න නිසාවෙනි. නැත. රෑට කා නැත.


කඩිමුඩියේ ඇඳෙන් නැගිටගත් අප මුහුණ කට සෝදා ජැන්ඩියට ඇඳ බැස්සේ මහමඟටය. එවිට උදෑසන 7 පසු වී විනාඩි 15 ක් පමණය. මඟ දෙපස දිව පිනවන පුසුඹෙන් පිරි කුඩා කෑම කඩයකි.

එක් පසෙක කඩයක වර්ණවත් වතුර බටයකට ගැසු සුරුට්ටුවක් දල්වාගෙන සිටින සුද්දෙකි. එවැනි සුරුට්ටුවක් ඉරීමට බාත් 100 ක් අය කරයි. එක් සුරුට්ටු පහරකින් ඉහ මොළ රත්වෙයි. නමුදු ගතෙහි වෙහෙස කොහේ ගියාද නැත.

ඉන්පසු කෙළින්ම අප හැරුණේ කුඩා ලී වංගෙඩියකට දමා කොටා අඹරා දෙන අච්චාරුත් මෑකරල්, කැරට්, ගෝවා සමඟ එවලේම පිසදෙන කිරි හොද්දත් බාස්මති හාලෙන් පිසු රසවත් කෑම පිඟන් පිරි කුඩා කඩයකටය. එක් පිඟානක් බාත් 40 කි. පසෙකින් වාඩිගත් අපි එය එකහුස්මට එය ගිල දැමීමු.

සිහි අසිහියෙන් එම ප්‍රනීත ආහාර වේලේ රස බුක්ති විඳිමින් සිටියදී අප අසලට පැමිණියේ අපගේ සංචාරක මඟ පෙන්වන්නිය වු ‘සරා’ (Sara) ය. ඉන්පසු ඇය අපව කැඳවාගෙන ගියේ අරුම පුදුම ලොවකටය. පෙනුමට එහි පිවිසුම පුදුම උපදවන්නෙකි.

පිවිසුම් දොරටුව අබියස ඇත්තේ අඩි 100 ක් පමණ උසැති වීදුරු බෝතලයකි. එතුළ සවිකළ විසල් නැවකි. අරුමයකි. නෙත් අදහා ගැනීමටද නොහැකිය.

මෙය පතායාහි පිහිටි බහුවිධ විනෝදාස්වාද මධ්‍යස්ථානයකි. උතුරු පතායාහි සුකුම්විට් මාර්ගයේ (Sukhumvit Road) මිනි සියැම් අබියස (Mini Siam) මෙය පිහිටා ඇත. විවිධ හැඩයන් හා විවිධ ප්‍රමාණයන්ගෙන් යුත් වාස්තු විද්‍යාත්මක ගොඩනැගිලි ප්‍රදර්ශනය කෙරෙන ලෝකයේ එකම කෞතුකාගාරය මේ පතායාහී බෝතල් කලාගාරයයි.

මේ බෝතල් කලා කෘතින් මඟින් සම්ප්‍රදායත්්, සංස්කෘතියත්, ජීවන සංසිද්ධින්, ලොව සුප්‍රසිද්ධ ස්ථාන සහ අලංකාර භූ දර්ශනයන් විදහා දැක්වෙයි.

බෝතල්වල සිදුකෙරුණු කලා කෘති 300 ක පමණ ප්‍රමාණයට අතිරේකව අතින් සකස් කළ විවිධ වර්ගයේ නෞකා ආකෘතීන්ද මේ කෞතුකාගාරයේ දැකිය හැකිය.

1995 වර්ෂයේදී මේ පතායාහී බෝතල් කලාගාරය මධ්‍ය පතායාහී (Central Pattaya) පිහිටුවන ලද්දේ ඕලන්ද ජාතික කලා නිර්මාපකයකු වු පීටර් බිජේ ඩෙලිජී (Peiter Bij Deleij) විසින්ය.

ඔහු ලොව පුරා පැතිර පවත්නා කලා කෘති දැකීමෙන් පිබිදුනු සිත් ඇත්තකු බවත් උසස් ගණයෙන් මේ කලා කෘති නිමැවීම සඳහා දිනකට පැය 15 ක පමණ කාලයක් වැයකර ඇති බවත් සංචාරක මඟපෙන්වන්නිය වු ‘සාරා’ අපට පැවැසුවාය.

කෙසේ වෙතත් පසුකාලීනව ඔහු සිය බෝතල් කලාගාරය රැකබලා ගැනීමේ වගකීම සිය ශිෂ්‍යයකු වු තූන් ප්‍රැපායිශ්‍රි තායිපානිච් (Khun Prapaisri Thaipanich)ට පවරා තිබේ.

මේ බෝතල් කෞතුකාගාරය නැරැඹීමට යන්නන්ට පළමුව කෞතුකාගාර කාර්යමණ්ඩලය විසින් ඉදිරිපත් කෙරෙන කෙටි වීඩියෝ දැක්මට සහභාගිවීමට සිදුවන්නේය. මේ වීඩියෝ දැක්ම ඉදිරිපත් කෙරෙන භාෂාව නරඹන්නන්ට අනුව වෙනස් වේ.

බොහෝවිට ඉංග්‍රීසි භාෂාවෙන් මෙය සිදුකෙරේ. නරඹන්නන්ට මෙහිදී ඔහුගේ සිතට නැගෙන ප්‍රශ්න කාර්යමණ්ඩලය වෙත යොමු කළ හැකිය.

මෙබඳු බෝතලයක නැඟෙන කලා කෘතිය මුලින්ම ඇරැඹීමේදී මැටි මත එකිනෙක ද්‍රව්‍ය තැබීමෙන් පසු ඒවා අතින් ඇතුළු කරමින් සංයමයෙන් යුතුව සැකසෙන බැවින් ඒවා විශිෂ්ට ගණයේ කලා කෘති බවට පත්වන්නේ ය. මේ සඳහා ඉවසීමේ ගුණය ප්‍රගුණ කළ යුතු අතර වඩාත් සූක්ෂම පෙනීමේ හැකියාවක්ද තිබිය යුතු ය.

තවද එම කෞතුකාගාරය නැරැඹීමට පැමිණෙන සංචාරකයන්ට කුඩා ප්‍රමාණයේ බෝතල්වල ඇති කලාකෘතීන් මිලදී ගැනීමටද අවස්ථාව උදාවෙන අතර ඒවා සකසන අයුරු අත්හදා බැලීමටද අවස්ථාව උදාවේ. පතායාහි පිහිටි මේ කෞතුකාගාරය නැරැඹීමට වැඩිහිටියකුගෙන් බාත් 200 ක්ද කුඩා ළමයකුගෙන් බාත් 100 ක මුදලක්ද අය කෙරේ.
ආසිරි මල්ලවආරච්චි සමඟ
නලින් දිල්රුක්ෂ 
තායිලන්ත සංචාරයකින් පසු

ස්තූතිය :- Hemas Travel (Pvt) Ltd හි
මදුෂ වරුසවිතාන මහතාට