ගෑවුණු තැන කන්න හැකි තායි සෝස් එකක් හදමු.....

මිරිස් කපන විට මීට වඩා සිහින් රවුම් සේ කපන්න

රස කාරකයක් හදමු
හැමදාම සංචාර , පොත් පත් හා විචාර ලියපු මම අද, සමකය වටේ යන ගමනේ දී තායිලන්තයේ ගත කළ කාලයේ  ඉගන ගත් තායි සෝස් එකක් හදන විදිය  මේ  පෝස්ටුවෙන්  කියල දෙන්නම්. මේක හිතවත් ඔබට කියන්න හිතුවේ ඒ තරම්ම රසවත් හා ගැවුණු තැන කන්න පුළුවන් විම හා හදාගන්න ඇති පහසුව නිසයි. වැඩි ආටෝප නැතුව කෙළින්ම වැඩේට ම බහිමු.මම හදන්නේ හතර දෙනකුට සැහෙන ප්‍රමාණයෙන්. අපේ ගෙදර ඉතින් ඉන්නේ 4 දෙනයිනේ.

අවශ්‍ය දේ......
1. හොඳට ඉදුණු දෙහි ගෙඩි 5ක්
2. මාළු සෝස් දෙහි ඉස්ම ප්‍රමාණයටම (කාගීල්ස් වලින් ගත හැක) මට ඇඩ් එකක් දියව්.
3. කොළ පැහැ අමු මිරිස් කරල් 3ක් 4ක්.
4. රතු පැහැ ඉදුණු මිරිස් කරල් 3ක් පමණ.
5. සුදු ලූණු බික් 4ක් පමණ.
6. එම ප්‍රමාණයටම අමු ඉගුරු කැල්ලක්.
7. ලුණු ගමිමිරිස් අවශ්‍ය පමණට.
8. රතු ලුණු හෝ බී ලූණු තරමක ගෙඩියක්.
9. කොත්තමල්ලි කොළ ස්වල්පයක්.. කැමතිනම් පමණක් ගන්න
10. සීනි ස්වල්පයක්

මාළු සෝස් (මෙය අත්‍යවශ්‍යය)

කොළ පැහැ අමු මිරිස්

රතු මිරිස් 

සාදන ක්‍රමය....


පළමුව දෙහිගෙඩි 5ම මිරිකා විදුරු බදුනකට ඉස්ම ටික එක්කර ගන්න. ඇට රේනු ඉවත් කරන්න. ඉන්පසු ඒ ඒ පැහැයෙන් යුත් මිරිස් කරල් වෙන වෙනම සිහින් රවුම් ආකාරයට කපා දෙහි ඉස්ම බඳුනට දාන්න. එවිට වර්ණ දෙකෙන්ම මිරිස් රවුම් කැබලි තිබිය යුතුය.

ඉන්පසු සුද්ධකරන ලද සුදුලූණු හා අමු ඉගුරු ඉතා සිහින් කොටු ආකාරයට කපා (රවුම් ආකාරයට හෝ පෙති ලෙස කපන්න එපා) පිහි මිටෙන් යන්තම් තලා දෙහි ඉස්ම එකටම දමන්න.එසේම රතු ලූණු හෝ බි ලූණු ද සිහින් කොටු ආකාරයටම කපා එම බදුනටම දමන්න. කොටු කුඩා වන තරමට රස වැඩිය.

දැන් දෙහි යුෂ ප්‍රමාණයටම මාළු සෝස් එම දෙහි බදුනට එක්කර ප්ලාස්ටික් හැන්දකින් කලවම් කරගන්න.මෙහිදි දියර ස්වභාවය තිබිය යුතුය. මිරිස් හා අනෙකුත් ද්‍රව්‍ය වැඩි නම් තව දෙහි ඉස්ම හා මාලු සෝස් එක්කරන්න.

ඉන්පසු රස අනුව ලුණු ස්වල්පයක් හා ගම්මිරිස් කුඩුත් එක් කරන්න. මාළු සෝස් ලුණු රස නිසා ලුණු දැමිමේ දි රස බලමින් ලුණු එක් කරන්න. එයටම සීනි තේ හැදි භාගයක් පමණ එක්කර කැමති නම් පමණක් සිහින්ව ලියා ගත් කොත්තමල්ලි කොළ ස්වල්පයක් උඩින් ඉසින්න.
මෙය හොදින් කළවම් කිරීමෙන් පසු තායි සෝස් එක සුදානම්ය. කළවම් කළ ද්‍රාවනය පැයක් පමණ හොදින්  වසා තබන්න. එවිට ය නියම පදම ලැබෙන්නේ.

අනතුරුව මෙය ඔබ ගන්නා ආහාරය හා ටිකක් මුසු කර ගත්විට ගැවුණු තැන රස වෑහේ.

මෙවන් භාජනයක සැදිම යෝග්‍ය්‍ය(කුප්පියේ මාළු සෝස්)

මෙය බත් සමග කෑමට මෙන්ම භාගයට තම්බන ලද එලවළුවල තවරා කැමටද නියමය. මස් හෝ මාලු පෙත්තක් හා ආහාරයට ද කදිමය.

තවත් විදියකට ගන්නේ නම් මෙසේද කළ හැකිය. එසේ කරන්නේ නම් මෙම සෝස් වැඩි ප්‍රමාණයක් අවශ්‍යය.

ඒ මෙසේයි...

ගොටු කොල, කන්කුන්, මුකුණුවැන්න, නිවිති යන දෑ සමාන ප්‍රමාණයන් ගෙන් ගෙන සිහින්ව ලියා භාජනයකට දමන්න. එය මතට ඉහත සාදාගත් සෝස් තරමක් වැඩියෙන් දමා කලවම් කර පැයක් පමණ වසා තබා ආහාරයට ගන්න. අවශ්‍ය නම් එයට තක්කාලි කැබලි 
ස්වල්පයක් හා ලියා ගත් ලූණු එක් කලාට කමක් නැත රස තවත් වැඩිවේ. ඉතින් අත්හදා බලන්නකෝ...
සේයා රූ ගුගල් (GOOGLE) වෙතින් උපුටා ගන්නා ලදි