මතක මං පෙත - 1

සති කීපයක්ම ගෙවී ගියේ බොහොම අවිවේකිව ය. මේ කාලය තුළ බ්ලොග නඩත්තුව මතු නොව අන් බ්ලොගක් හෝ කියවන්නට අතපසු විය. සතියේ දිනවල කාර්යාල කටයුතු ද සති අන්තයන් නම් විනෝද කාමී කටයුතුවල ද යෙදෙමින් ඒ සති කීපයම ගෙවී ගියේ ය.
ඒ අතර වූ සුවිශේෂි සිදුවීම් දෙකක් වුයේ බ්ලොග් අවකාශය හරහා අප දැනගන සිටි ඉන්දික උපශාන්ත සහ උදිත මීගහතැන්න යන දෙසොහොයුරන්ව හමුවීම ය. ඒ අවස්ථාවන්ට මා හිතවත් තවත් සහෘද බ්ලොග් කරුවන් කීප දෙනෙකුම එක්ව සිටියහ. දුරු රටක සිටියත් සයිබරය හරහා ඇතිකරගත් මිත්‍රත්වය තහවුරු කරමින් අප හමුවට ආ ඒ සොයුරන් දෙපළට ම ස්තුතිය මුලින් ම පුද කරමි.


සයිබරයේ මිතුරු සමූහයක් වූ සහෘදයෝ සංවිධානය කළ අරලගංවිල අරෝෂ් සොයුරාගේ සුවදුක් බලන්නට යෑම එක් සති අන්තයක සිදු විය. එය චාරිකාවක ස්වරූපය ඉක්මවා ගිය මිත්‍රත්වය දෝරේ ගලා ගිය චාරිකාවක් ම වීය. කැළුම් බී විජේවර්ධන නම්  අති දක්ෂ ඇඩ්මින්වරයා සංවිධානය කළ එම චාරිකාවට බ්ලොග් කරුවන් ලෙස මමත් දුලිප් සිකුරාජපතිත් එක් වීමු.
දෙවැනි සති අන්තය රාජකාරිමය ගමනක් වුවත් බදුල්ල පස්සර බිබිල මහියංගනය වැනි පෙදෙස්වල ගත කෙරුවෙමි.
තෙවැනි සති අන්තය අපේ ම එකක් වීය. ඒ බ්ලොග් කරුවන්ගේ ගාලු සවාරිය යි. එය ද කිසි දින අමතක නොවන චාරිකාවකි. බ්ලොග් කරුවන්ට අමතරව සයිබර් මිත්‍රත්වය තහවුරු කරමින් ඒ චාරිකාවට අපේ හිතවතුන් කීප දෙනෙක්ම එක්ව සිටියහ.

මේ ගෙවී යන්නේ මගේ මුද්‍රිත මාධ්‍ය රස්සාවේ 27 වැනි වසරයි. කලෙක රැකියාවේ තෘප්තිය උපරිමයෙන් ද, මේවන විට වගකීමේ පීඩනයෙන් ද යුතුව සතුටින් ඒ බඩ රස්සාව කරගන යමි.
රට තොට ඇවිද යමින් රැකියාව කළ කාලය එහි තෘප්තියේ උපරිම යුගයයි. එහෙත් වගකීම් සහිතව මේසයක් මත හිදගන කරන රැකියාව තුළ ඒ තෘප්තිය නොමැත. ඒ වෙනුවට ඇත්තේ පීඩනය හා ව්‍යාකූලත්වයයි.

ඒකී පිඩනය සමනය කරගනු වස් මවිසින් තෝරාගත් විනෝදාංශය වූයේ බ්ලොග් ලිවීම යි. මුහුණු පොත, ට්වීටරය සම සේ භාවිත කළ ද බ්ලොග හරහා යි  මා සයිබරයේ නියම පංගු කාරයකු වූයේ. ඒ මෙයිට හරියටම දෙවසරකට පෙර දිනකය.

මුද්‍රිත මාධ්‍යයෙන් පටන් ගෙන සයිබරයේ ද කොටස්කරුවකු ව හුන් මට පසු ගිය දා සිට ගුවන් විදුලියේ ද මාධ්‍ය මෙහෙවරක නියැලෙන්නට අවස්ථාව ලැබිණි. ඒ පසුගිය සතියේ සිට ඇරැඹී සිටි එෆ් එම් සේවයේ උදේ 8.30 සිට සවස 5.30 දක්වා පැයෙන් පැයට විකාශයවන තිස්වැනි මිනිත්තුවේ පුවත් දිනමිණ ප්‍රවෘත්ති මැදිරියේ සිට විසුරුවා හරින්නට පටන් ගත් බැවිනි.

ඉතින් පත්තරයේ වැඩට අමතරව පැයෙන් පැයට ගුවන් විදුලියේ විසුරුවා හරින්නට පුවත් සෙවිල්ල ද මා කර මතට වැටි හෙයිනි සතියේ දින ටික දැඩි ලෙස අවිවේකී වූයේ. ඉතින් බ්ලොගට වදින්නට ඉඩක් කොයින් හොයා ගන්න ද?

සමකය වටේ බ්ලොග් අඩවියට දෙවසරක් පිරෙන මේ මොහොතේ එදා මෙදා තුර මගේ රසිකයන්ව මේ බ්ලොගට ගොඩවැදුණු එමෙන්ම ප්‍රතිචාර දක්වපු ඔබ සැම නොවන්නට මේ ගමන මේතම් දුරක් නොඑන්නට ඉඩ තිබිණි. මට සදා ශක්තියක් වූයේ බ්ලොග් කියවපු කමෙන්ට් කරපු ඔබ සැමයි. ඔබ සැමට ලෙන්ගතුව පිරිනමන මගේ ප්‍රණාමය පිළිගන්න.

මා බ්ලොග පටන් ගෙන සිව් මසක ඇවෑමෙන් ආ ජනවාරි පළමු දිනක මාතලන් දැමූ කමෙන්ටුවක් අදමෙන් මතකය. වසරේ සාර්ථකම බ්ලොග් කරුවා ඔබයි. ඒ වදන මට මහා ශක්තියක් ම විය. අද එහි තත්ත්වය කිමදැයි තීරණයද ඔබටම භාර කරමි.

එසේම අවිවේකිව කරනා මේ බ්ලොග් කෙරුවාවේ දී මට නිරන්තර ලිපි සපයා දෙමින් මා දිරිමත් කරන සමුද්‍රිකා හේරත්, රන්ජන් අමරරත්න, කුමාර සිරිවර්ධන, ශ්‍යාමා සමරසිංහ, නිශ්ශංක විජේරත්න මෙන්ම නන්දික බැද්දේගම ද බොහොම ගෞරවයෙන් මේ මොහොතේ සිහිපත් කරමි.
 සමකය වටේ බ්ලොග වෙබ් පිටුවක ආකාරයට සකසා දුන් නදීක සෙනරත් සොයුරාවද හද පිරි බැතින් සිහි කරමි මේ මොහොතේ.

මෙන්න දෙවසරක ආ ගමන් මග කෙටියෙන්

ලිපි 524 කි.
ප්‍රතිචාර 14438 කි
බ්ලොග ෆලෝ කරන්නන් ගණන 459කි.
මේ වන විට අඩවියේ පිටු පෙරළා ඇති ගණන 772206 කි
ඇලෙක්සා දර්ශකයේ අද සිටින තැන 960 ස්ථානයේ ය.

නිබඳ මා දිරිමත් කළ ඔබ සැමට ස්තුතියි.....

රූ සැඳෑව සමූහයේ චාරිකාවත් අත ළග ය.......

ප්‍රතිචාරවලට නිසි තැන උත්තර දැමුවද කීපයක් පහළින් වැටී ඇත. ඒ ලෙඩේ නිසාම මා හැම උත්තරයක්ම අදාළ අයගේ නමින් දමා ඇත. මේක මට විතරක් ආව ලෙඩක්ද? දන්නා කෙනෙක් ඒ ගැන කියා දෙන්න.