|කොළපතන ඇල්ල සොයා ගිය චාරිකාවක්|

කොළපතන ඇල්ල KOLAPATHANA fall

සුන්දර වූ මන්දාරම් නුවර ගැන මම අසා තිබුණෙමි. එහෙත් කිසි දිනක එහි පා තබා නොතිබුණි. මන්දාරම් නුවර සිරි නැරඹීම එනිසාම මගේ සිහිනයන් අතර රැඳී තිබිණි.
පසු ගිය දා ඒ සිහිනය සැබෑ කර ගන්නට හැකි විය. ඒ ගමනට මා හා 27 දෙනකුම එකතු වීම තවත් සතුටක් ම විය. ඉන් එක් අයෙකු හැරෙන්නට අන් කිසිවකුත් එහි ගොස් නොතිබිණි.
පමා වී ඉර පායන වේලාසනින් ඉර බැස යන පුරවරයක් ලෙසටය මන්දාරම් නුවර හැඳින් වෙන්නේ. 
පැති දෙකකින් මන්දාරම් නුවරට ළගා විය හැකිය. එක් මාවතක් වන්නේ මහ නුවර හරහා පදියපැලැල්ලෙන් හැරී මන්දාරම් නුවරට ළගා වීමය.

අනිත් මාවත නම් නුවරඑළිය හරහා කඳපොළ හයිෆොරස්ට් වතුයාය මැදින් ගෝනපිටිය  ගුඩ්වුඩ් වතුයාය හරහා මන්දාරම් නුවරට ළගාවීමය.
ඉන් අපි තෝරාගත්තේ නුවරඑළිය හරහා වැටී ඇති වඩාත් සුන්දර වූ මාර්ගයයි. 

චාරිකාවේ පළමු දිනය අපි සිතල නුවරඑළියේ නවාතැන් ගතිමූ. එහිදී සිත් සේ විනෝද වූයෙමු.  පසු දින අළුයම 5ට අපි නුවරඑළියෙන් පිටත් වූයේ හිරු උදාවන සුන්දර දසුන හයිෆොරස්ට් කඳුයායේ සිට නැරඹීම අරමුණු කරගනය. සුදෝ සුදු වලා සේලයෙන් කදුවැටිය සැරසෙද්දී රන් කිරණින් හිරු උදාවන අයස්කාන්ත දසුන අපි මහත් අභිරුචියෙන් දැකගතිමු. සරු සාර තේ වතු මැදින් වැටුණු අප ගමන් ගත යුතු පටු මාර්ගය  සර්පයෙකු සේ පහළින් දිස් වෙයි. 
ගිත ගායනයේ නිපුනයන්ගෙන් මෙන්ව වාදනයේ නිපුනයන්ගෙන් ද පිරි අපේ නඩය එකම රස ගුලාවක කිමිදෙමින් අවට සිරි නරඹමින් උදැසන 7 පමණ වන විට මන්දාරම් නුවර අපේ නවාතැන් පළ වූ ගුඩ්වුඩ් වතු යායට සේන්දු වූයෙමු. නුවර එළියේ සිට මේ ස්ථානයට ඇත්තේ කිලෝමීටර් 40ක පමණ දුරකි.
එම වතු බංගලාවේ හිමිකරු වූ බණ්ඩාර කපුකොටුව මහතා අප පිළිගත්තේ රසවත් ගමේ කොළවලින් රසවත්ව සෑදූ කොළකැඳ වීදුරුවක් අපට පිළිගන්වමිනි.
ඉන් අනතුරුව අවට සිරි නරඹා රසවත් වූ ගමේ තාලයට හැදූ උදේ ආහරය රස විඳි අපි එතැන් සිට කිලෝමීටර් හතරක් තරම් දුරින් පිහිටි මන්දාරම් නුවරට පල්ලම් බැස්සෙමු. මන්දාරම් නුවර හන්දියේ දී අප පිළිගන්නට අපේ මග පෙන්වන්නා සුදානමින් සිටියේ ය.
ඉපැරණි මන්දාරම් නුවර තේ කර්මාන්ත ශාලාව අසල අපේ වාහනය ගාල් කළ අපි එතැන් සිට කෙටි මාවත් ඔස්සේ සුන්දර හෙල්මලු වගාවන් නරඹමින් වනගත පරිසරයට ඇතුළු වූයෙමු.
අපේ අරමුණ වූයේ වනය තුළ සැගව පවතින කොළපතන ඇල්ල නම් වූ දිය ඇල්ල නැරඹීමයි. එක පසෙකින් පිදුරුතලාගල කන්ද දිස්වෙයි. අපේ ගමන් මග වැටී ඇත්තේ පිදුරතලාගල කන්දේ පහළම පෙදෙසකිනි. තවත් පසෙකින් රන්කොටියාගල බොක්ක දිස්වෙයි. මෙහි කෝටියක් වටිනා රන් නිදන්කොට ඇතැයි ජනප්‍රවාදයේ පවතින බව අපේ මග පෙන්වන සොයුරා අප හා පැවසීය. කඳුවැටි බඩ වැටි මැදින් දිවෙන අඩි පාරේ ක්‍රමයෙන් ඉහළට යන විට වන මැද ඇතින් කොළපතන කොමලිය සිය සුදෝ සුදු වරලස උණා දමා හැඩ වැඩ වී ඇද හැලෙන හැටි අපි දුටිමු. එහි නැරඹූම් ස්ථානයෙන් නොනැවතුණු අපි කීප දෙනෙක් දිය ඇල්ලේ නියම සුන්දරත්වය විඳගන්නට තරමක් අසීරු පල්ලම බසිමින් ඇල්ල පාමුලටම පිවිසියෙමු. එතැන කදිම ස්වාභාවික ජල තඩාගයකි. නොකිළිටි දිය දහර අපේ සිරුරුවලින් කිලිටි වීදෝ යන සැකය ඇතත් අපි සිත් සේ දිය කෙළියේ යෙදුනේ ගමනේ විඩාවට එය කදිම ඔසුවක් වූ බැවිණි. ඉන් නොනැවතුණු අපි සයගයන් හතර දෙනෙක් දිය ඇල්ලට සමාන්තර කැළැ මාර්ගයෙන් දිය ඇල්ලේ මැද ප්‍රමාණයක් දක්වා කඳු තරණයේද යෙදුණේ සිතේ ඇති ආශාව නිසාමය.  ඒ සඳහා පළපුරුදු කඳුනගින්නන් දෙදෙනකු අප සමග සිටිම අපට මහත් ශක්තියක් ම විය. එසේ පළපුරුදු මග පෙන්වන්නන් නොමැතිව ඒ මග ගමන් කිරිම අනතුරු දායකය.
ඔබ කඳු නැගිමට ප්‍රිය කරන අයෙක් නම් ඇල්ල බැලීමෙන් අනතුරුව මේ කඳවැටිය තරණය කිරිමට අවස්ථාව තිබේ. පිදුරතලාගල කන්ද මට්ටමටම ආසන්න උසකට මේ මග ඔස්සේ ගමන් කර හැකි අතර එසේ යන්නේ නම් අනිවාර්යෙන්ම ගමන් මග පෙන්නන්නෙකු සමග යන්න.
තවද මේ මන්දාරම් නුවර අවට වන පෙත මැද දිය ඇලි කීපයක්ම තිබෙන බවත් ලංකාවේ දෙවැනියට උසම ඇල්ල වූ කුරුඳු ඇල්ල ද පිහිටා ඇති බවත් ගම්වාසීන් ගෙන් අපි දැනගතිමු. එහෙත් අපේ පිරිස වැඩි කමත් කාලය හරස්ව ඇති නිසාත් අපි ඒ අවස්ථා මග හැරියෙමු.
පසු දින අපේ ඇවිදීමේ ගමන් මග ලෙස අපි තෝරාගත්තේ ගෝනා පිටිය කන්ද තරණයයි. ගෝන පිටිය තේවත්ත මැදින් ඇදී ගිය මාවත ඔස්සේ අපි මේ කන්ද තරණය කෙරුවෙමූ. පයින් ඇවිදීමට අකමැතිනම් ත්‍රීවිලරයකින් වුව මේ කන්ද මුදුනට ළගා විය හැකිය. එය වඩාත් දිගු මාර්ගයකි.  ගෝනපිටිය කඳුමුදුනට ගිය අපට හාත් පස දැක ගත හැකි විය. එහි එක් පැත්තක් සමාන වෙනනේ ලෝකාන්තයටයි. එය පහළින් මන්දාරම් නුවර ගෙවල් ගිනි පෙට්ටි මෙන් දිස්වෙයි. ඇතින් පෙනෙන දිය ඇලි කීපයක්ද දැක ගත හැකිය. විඩාබර හිරු එළියෙන් තොර අපුරු කඳුතරණයක චමත්කාරය විඳි අපි සවස් යාමයේ මන්දාරම් නුවරින් පදියපැලැල්ල රිකිල්ලගස්කඩ හරහා නුවරටත් එතැනින් කොළඹටත් සේන්දු වූයෙමු.
විශේෂ ස්තුතිය ජිනප්‍රිය ගාල්ලගේ මහතාට සහ බණ්ඩාර කපුකොටුව පවුලේ සැමට.
අයෝමය ශක්තියක් වෙමින් අප හා එක් වූ සෙසු 25 දෙනාටමද හද පිරි තුති පුදන්නෙමි.

මේ චාරිකාවේ විඩියෝව පහතින් නරඹන්න

naleen dilruksha